Ақмола облысында жылыту маусымы басталғалы 45 өрт тіркелді

Ақмола облысында жылыту маусымы басталғалы 45 өрт тіркелді.

Оқыс жағдайлардың бәрі жеке секторда болған. Тілсіз жаудың тұтануына көбіне пештен шығатын ақау мен электр сымдарының тұйықталуы себеп. Сондықтан сала мамандары профилактикалық шараларды күшейтті. Яғни тұрғын үй секторларын аралап, жан-жақты түсіндіру жұмыстарын жүргізіп жатыр.

Жылыту маусымы басталғалы төтенше жағдайлар қызметінде тыным жоқ. Әр үйді аралап, қауіпсіздік шараларын тексеріп жүр. Тіпті қажет болған жағдайда пеш мұржаларын тазартып, улы газға қарсы дабыл қондырғыларын орнатып береді.

Ерсайын Қойшыбаев, ТЖД ресми өкілі:

- Соңғы 3 жылда осындай қондырғылардың көмегімен 30 адамның өмірін құтқарып қалдық. Жалпы жасыратыны жоқ көбі қауіпсіздік ережелерін сақтамайды. Біз осындай шаралар арқылы қарапайым ережелерді түсіндіріп, мұқият болуға үндейміз.

Мамандар жыл басынан бері 11 мың үйге осындай қондырғы орнатқан. Оның 9 мыңы әлеуметтік аз қамтылған және жалғыз тұратын қариялар.

Павел Алексеенко, қала тұрғыны:

- Қыркүйек айының басында пеш мұржасын тазалап қойдық. Жылыту маусымына шамамыз келгенше дайындаламыз. Бұл бірінші кезекше өзімізге қажет. Енді міне мамандар дабыл құрылғыларын орнатып жатыр.

Бірақ бәрі Павел Алексеенко сияқты қауіпсіздік шараларын ескере бермейді. Ал салғырттық салдары қайғылы жағдайға алып келеді.

Ерсайын Қойшыбаев, ТЖД ресми өкілі:

- Өкінішке орай, жылыту маусымы басталғалы өрттен бір адам қайтыс болды. Қайғылы жағдай өткен аптада Шортанды ауданында тіркелді. Сондықтан осындай оқыс оқиғалардың алдын-алу мақсатында профилактикалық шараларды күшейттік.

Бірақ құзырлы орган өкілдері өртке жол берген тұрғындарға ешқандай айыппұл сала алмайды. Сондықтан да болар үй иелерінің көбісі олардың сөзіне құлақ аса бермейді. Жалпы былтырғы жылыту маусымында өңірде 300-ге жуық өрт тіркеліп, 16 адам көз жұмды.

Абзал Азаматұлы, Евгений Шинкаренко