Ақмола облысындағы ең қымбат сүйіс Қазнетті қызықтырды полиция құпияны ашты

Әлеуметтік желілерде жүріп бара жатқан көлікте жүргізуші мен жолаушының сүйіскені түсірілген сурет тарады. Желі қолданушылары бұл кадрды жол камерасы түсіріп алған, ал көлік жылдамдықты асырған деп болжады. Tengri Life мән-жайды анықтады.

Неден басталды?

Әлеуметтік желіде жарияланған суреттен рөлдегі ер адамның қасында отырған жолаушы қызға қарай еңкейіп тұрғанын көруге болады. Көлік жүріп бара жатқанда, жұп салонда сүйісіп отыр.

Жазба авторлары жол камерасы ерекше сәтті ғана емес, жылдамдықты асыру дерегін де тіркегенін айтады. Осы нұсқаға сәйкес, автокөлік рұқсат етілген сағатына 60 шақырымның орнына 80 шақырым жылдамдықпен жүйткіген.

Кадрда құқықбұзушылық тіркелген жер мен уақыт көрсетілген: Ақмола облысы, Шортанды ауданы, Астана - Щучье тасжолының 83-шақырымы, 2025 жылғы 24 желтоқсан, сағат 09:20.

Сондай-ақ жарияланымдарда мұндай құқықбұзушылық үшін айыппұл 43 250 теңге болуы мүмкін екені атап өтілген. Сондықтан желі қолданушылары бұл суретті әзілдеп "қымбат фотосессия" деп атап, бұл сәт кейіпкерлердің есінде ұзақ сақталады деп болжады.

Дегенмен, жазбадан сурет расында жол камерасына түсірлгені немесе басқа тәсілмен жасалғаны белгісіз болды.

Instagram-дағы бұл жарияланымды көру

Ахмадиев Садбектің (@sadbek_sunday) жарияланымы

Жазба тез арада мыңдаған қаралым мен жүздеген пікір жинады. Пікір қалдырушылардың ойы сан саққа жүгірді: бірі бұл кездейсоқ сүйіс пе әлде жұп камераға әдейі түскісі келді ме деп дауласса, енді бірі жолдағы қауіпті әрекетті романтизациялауды сынға алды, ал үшіншілері сурет кейіпкерлерінің бір-біріне кім екенін болжай бастады.

"Бастысы - әйелі болса болды", "Мұндайды романтика қылмау керек", "Егер көлік әйелінің атына тіркелген болса ше? Айыппұл туралы хабарлама оған барады - міне нағыз фиаско", "Бұлай жариялауға бола ма? Ал егер көңілдесі болса ше?", "Фотографқа ақша төлеп, дұрыс сурет жасату оңай емес пе еді?", "Өте сүйкімді. Суретті жақтауға салып қоюға болады", "Ал әйелі біле ме?", "Ең әдемі айыппұл", "Гештальт пайда болды", - деп жазды желі қолданушылары.

Көреген оқырмандар да табылып, суреттің шынайылығына күмән келтірді. Жазба астында бұл фейк немесе жасанды интеллект туындысы болуы мүмкін деген болжамдар пайда болды.

Жағдайды нақтылап, кадрдың түпнұсқалығын тексеру үшін біз Ақмола облыстық Полиция департаментінің баспасөз қызметіне хабарласып, суретке пікір білдіруді сұрадық. Онда тіркелген құқықбұзушылық туралы ақпарат расталмады. Ведомство желіде тараған суреттің нақты тіркеу камерасына еш қатысы жоқ екенін, жасанды интеллект арқылы жасалғанын түсіндірді.

Айта кетейік, бұған дейін Жасанды интеллект министрлігі нейрожелілер көмегімен жасалған немесе өзгертілген суреттерге қандай талап қойылатынын хабарлаған болатын.

Ведомство мәліметінше, ЖИ-контенттің арнайы таңбасы болуы тиіс. Пайдаланушы суреттің жасанды интеллект қолдану арқылы жасалғанын немесе өзгертілгенін түсінуі керек. Мұндай жарияланымда тиісті белгі, мысалы, "ЖИ көмегімен жасалған" немесе "ЖИ генерациялаған" деген жазу болуы шарт.

"Пайдаланушыларды ЖИ жүйелері қызметінің синтетикалық нәтижесі туралы хабардар ету жауапкершілігі осындай жүйелердің меншік иелеріне немесе иеленушілеріне жүктеледі", - деп атап өтті министрлік.

Сондай-ақ таңбалаудың болмағаны үшін айыппұл қарастырылғаны айтылды. Мөлшері иеленушінің немесе меншік иесінің мәртебесіне байланысты: жеке тұлғаларға - 15 АЕК, шағын бизнес және коммерциялық емес ұйымдарға - 20 АЕК, орта бизнеске - 30 АЕК, ірі бизнеске - 100 АЕК.

Google News арқылы жаңалықтарымызды қадағалаңыз