АҚШ Иранға жасалған соққылардың жаңа толқыны туралы жариялады не белгілі

АҚШ Қарулы күштері Иранның әскери нысандарына соққылардың жаңа сериясын жасады. Мән-жайды АҚШ Қарулы күштерінің Орталық қолбасшылығы (CENTCOM) хабарлады, деп жазады Tengrinews.kz.

Америкалық қолбасшылықтың мәліметінше, CENTCOM күштері Иран аумағындағы 90-ға жуық әскери нысанаға шабуыл жасады. Олардың қатарында әуе шабуылына қарсы қорғаныс жүйелері, жағалауды бақылау құралдары, зымырандар мен ұшқышсыз ұшу аппараттарының қоймалары, ел жағалауындағы әскери-теңіз күштері мен әскери логистика нысандары бар.

CENTCOM бұл операция Иранның Ормуз бұғазындағы коммерциялық кемелер мен азаматтық теңізшілерге шабуыл жасау мүмкіндіктерін одан әрі шектеуге бағытталғанын мәлімдеді.

Америкалық әскерилер бұл соққылар бір күн бұрын басталған операцияның жалғасы болғанын атап өтті.

https://t.co/fiKJRI9zmE

— АҚШ Орталық қолбасшылығы (@CENTCOM) July 9, 2026

Еске сала кетейік, бұған дейін CENTCOM Ормуз бұғазындағы сауда кемелеріне жасалған шабуылдарды алға тартып, Ислам Республикасындағы 80-нен астам нысанаға соққы жасалғанын хабарлаған болатын. Иранның әуе шабуылына қарсы қорғаныс жүйелері, басқару және байланыс желілері, жағалаудағы радиолокациялық қондырғылар, кемеге қарсы зымырандық қорғаныс құралдары, сондай-ақ Ислам революциясы сақшылар корпусының (ИРСК) 60-тан астам катері нысанаға алынды.

Ирандық БАҚ-тың хабарлауынша, Тегеран басшылығы америкалық соққылардың алғашқы толқынына қарымта шаралар қолданылатынын жариялады. Кувейт пен Бахрейн Иран тарапынан атқылау болғанын хабарлады. Шабуылдар үшін жауапкершілікті ИРСК өз мойнына алып, бұл әрекеттердің "Хормозган және Махшахр провинцияларындағы бірқатар жағалау базалары мен азаматтық нысандарға жасалған әуе соққыларына" жауап ретінде екі елдегі америкалық әскери нысандарға бағытталғанын алға тартты.

Тағы оқыңыз: Тегеран АҚШ-тың авантюралық әрекеттеріне дереу жауап қайтаруға уәде берді