АҚШ пен Оңтүстік Корея арасындағы сауда келісімі жасалмауы мүмкін

Алайда Вашингтон мен Сеулдегі жоғары лауазымды шенеуніктер Трамптың Оңтүстік Кореяның АҚШ-қа 350 млрд доллар инвестиция салу талабы келісімге келуге әлі де кедергі болып отырғанын мәлімдеді. 

Кореялық шенеуніктер тікелей ақша құю олардың экономикасын тұрақсыздандыруы мүмкін екенін және олар несие алғанды жөн көретінін айтты. 

Трамптың талаптары мен Оңтүстік Корея ұсына алатын нәрселер арасындағы сәйкессіздік АҚШ пен Оңтүстік Корея президенттерінің кездесуіне көлеңке түсіру қаупін тудырып отыр.

Қазіргі кезде Оңтүстік Кореяда автомобильдерге 25% баж салығы енгізілген. Бұл Hyundai мен Kia компанияларын 15% баж енгізген жапониялық және еуропалық бәсекелестерімен салыстырғанда қолайсыз жағдайға қалдырды. 

Қыркүйек айында Джорджиядағы Hyundai зауытына АҚШ иммиграциялық рейді жүргізілгеннен кейін жағдай ушығып кетті. 300-ден астам оңтүстік кореялық ұсталып, бұл аталған ел азаматтарының наразылығын тудырды.

Ли хабарлағандай, егер виза жүйесі жақсартылмаса, компаниялар болашақта инвестиция салмауы мүмкін. 

Қазан айының басында Оңтүстік Кореяның Сыртқы істер министрлігі АҚШ оңтүстіккореялық жұмысшылардың Америкадағы өнеркәсіптік нысандар құрылысына қатысу үшін қысқа мерзімді визалармен немесе визадан бас тарту бағдарламасы бойынша елге кіруіне рұқсат беруге келіскенін жеткізді. 

Бейсенбі күні Оңтүстік Кореяға сапары кезінде Трамп Қытай көшбасшысы Си Цзиньпинмен кездеседі деп күтіліп отыр. Вашингтон мен Бейжің шиеленісті бәсеңдетуге дайын екенін мәлімдеді. 

Трамп сонымен қатар Солтүстік Корея көшбасшысы Ким Чен Ынмен кездесу мүмкіндігін меңзеп, Кимнің оның ұсынысына әлі жауап бермегеніне көңілі түскенін айтты. 

– Ким Чен Ынмен өте жақсы тіл табыстым. Егер ол менімен кездескісі келсе, Оңтүстік Кореяда боламын, - деді Дональд Трамп.

АҚШ президенті сондай-ақ Киммен сөйлесу мүмкіндігі болса, Оңтүстік Кореяға сапарын ұзартуға дайын екенін мәлімдеді. 

Бұған дейін Дональд Трамп пен Жапония премьер-министрі Санае Такайчи екіжақты кездесудің қорытындысы бойынша сауда және негізгі пайдалы қазбалар бойынша екі келісімге қол қойғанын жазған болатынбыз. 

Бірінші келісім АҚШ-Жапония альянсында «жаңа алтын ғасырды» қарастырды және АҚШ-тағы жапониялық инвестицияның 550 миллиард долларына айырбас ретінде жапон тауарларына 15% баж салығын енгізетін сауда келісімін қамтыды.