​АҚШ пен Қытай басшылары Бейжіңдегі келіссөзде кездесті

2026 жылғы 14 мамырда АҚШ президенті Дональд Трамп Қытайға ресми сапармен барып, Бейжіңдегі Халық жиналысы үйінде ҚХР төрағасы Си Цзиньпинмен келіссөздер жүргізді. Бұл туралы АА хабарлады. 

Кездесу басында Си Цзиньпин екі ел арасындағы қарым-қатынасты жаңа арнаға бағыттап, әлемдік тұрақсыздық жағдайында ортақ жауапкершілікпен әрекет ету қажеттігін атап өтті.

Ол Қытай мен АҚШ-тың ортақ мүдделері көп екенін, сауда соғыстарында жеңімпаз болмайтынын және барлық дауларды тең құқықты консультациялар арқылы шешу керектігін айтты. Тайвань мәселесіне тоқталып, бұғаздағы бейбітшілік пен тұрақтылықты екі елдің «ең үлкен ортақ мүддесі» деп атады.

Трамп бұл кездесуді «мүмкін тарихтағы ең ірі саммит» деп сипаттап, АҚШ пен Қытай арасындағы қарым-қатынастар бұрынғыдан да жақсы болатынына сенім білдірді. 

«Біз әрқашан қиындықтарды еңсере білдік. Бірге бізді жарқын болашақ күтіп тұр», — деді ол.

Келіссөздерден кейін Трамп Аспан ғибадатханасын аралап, құрметіне ұйымдастырылған ресми кешкі асқа қатысады. 15 мамырда екі лидер тағы да кездесіп, шай үстінде пікір алмасып, жұмыс түскі асын өткізеді.

Келіссөздерде сауда мен экономикадан бөлек, АҚШ пен Израильдің Иранға жасаған соққыларынан кейін басталған соғыс және Тайвань төңірегіндегі жағдай талқылануы күтіледі.

Бүгін, 12:18