АҚШ Украина: Бейбітшілік жоспары 95% келісілді

Дональд Трамп пен Владимир Зеленский кездесті. «Бейбітшілік жоспары бойынша АҚШ пен Украина 95 пайызға келісті». Бірер сағат бұрын Флоридада өткен кездесуде екі жақ осындай қорытындыға келді. 2,5 сағаттай әңгіме өрбіткен жиын түскі ас форматында өтті.

Кездесуден соң Дональд Трамп Владимир Путинмен сөйлесті. Қос президент еуропалық басшылармен де бейне байланысқа шығып, соғысты аяқтауға қатысты жоспарды талқылады.

«АҚШ пен Украина бейбітшілік жоспары бойынша 95 пайызға келісті». Зеленский мен Трамп өздерінің ең ұзақ кездесуінен соң осылай деп ортақ мәлімдеме жасады. Бұған дейін қос президенттің диалогы бүгінгідей ұзаққа созылмаған. Бұл жолы 2,5 сағат әңгімелесті. Дегенмен Вашингтонның құлықсыздығы ма, әлде жиындардың көптігі ме, Владимир Зеленскийді Палм Бич әуежайында АҚШ шенділері тарапынан ешкім күтіп алмады. Жыл басындағы Ақ үйдегі дау естен кетпеген де болар, бірақ Мара-Лагодағы кездесу жылы басталды. Жиналғандардың қатарында кезінде сол дауды өршіткен АҚШ-тың вице президенті Джэйди Вэнс болмады. Тараптар түскі ас үстінде бас қосты. Содан ба, кім білсін, кездесуге дейінгі 90% меже бүгін 5 пайызға ілгеріледі. Мемлекет басшылары Украинаға берілетін қауіпсіздік кепілдігі бойынша толық мәмілеге келгенін айтты. Анық-қанығы ашық айтылмады. Десе де естеріңізге сала кетейік, НАТО форматындағы қорғаныс пен АҚШ-тың 15 жылдық қауіпсіздік кепілдігі осыған дейін күн тәртібінде болды. Ал әлі келісілмеген мәселе, 95-ке жетпеген 5 пайыз - Донбас аймағының тағдыры мен Украинаның тұтастығы болып отыр.

Владимир Зеленский, Украина президенті:

- Біз бүгін 20 бөлімнен тұратын бейбітшілік жоспарын талқыладық. Нәтижеге екіжақтап жақындап қалдық. Біз бір күн не бір апта емес, бір айдан аса уақытта осы жоспар төңірегінде жұмыс істеп келеміз. Женева, Берлин, Майамидегі жиындар соған куә. Донбас - өте қиын мәселе болып отыр. Сіздер біздің айқын позицияны білесіздер. Заң бар. Жер иесі - халық бар. Қоластымыздағы аймақ бар. Біз оған құрметпен қараймыз. Президент Трамп айтқандай, бұл - өте күрделі мәселе. Мәскеудің көзқарасымен сәйкес келмейді.

Зеленский бейбітшілік жоспары 100 пайыз дайын болғанда оны барша Украина азаматтары үшін референдумға салуы әбден мүмкін екенін тағы да шегелеп айтты. Ал АҚШ президентінен журналистер өз позициясын бекіту үшін Киевке барар-бармасын сұрағанда, сенімді жауап бере алмай, «Егер соғысты аяқтауға әлде бір әсерім тисе, неге бармасқа» деп, Украина Парламентінде сөз сөйлеуге дайын екенін жеткізді. Бұдан бөлек Дональд Трамп кездесуден кейінгі Владимир Путинмен болған әңгімені де тілге тиек етіп, Ресейдің Украинаны қалпына келтіруге қатысты позициясын жеткізді. 

Дональд Трамп, АҚШ Президенті:

- Ресей көмектесетінін айтты. Ресей Украинаның дамып, өркендегенін көргісі келеді. Бұл біртүрлі болып естілсе де, Президент Путин бұл мәселеге зор мәрттікпен қарайды. Соның ішінде арзан қуат көзі мен электр энергиясын жеткізуге де дайын. Бүгінгі телефон қоңырауында сол секілді жақсы дүниелер айтылды. Біз командамен осы бойынша жұмыс істейміз.

Бұдан бөлек, Дональд Трамп мәселенің өзі тоқтатқан соғыстары арасындағы ең күрделісі екендігін атап өтіп, жоспарды біржақты етуге тағы бірнеше апта қажет екендігін алға тартты. Ол үшін өз тарапынан жұмыс тобын да бекітті. Мемлекеттік хатшы Марко Рубио, Пентагон басшысы Пит Хэгсет, Арнайы өкілдері Стив Уиткофф пен Джаред Кушнер, Генерал Кейнс бастаған топ алдағы уақытта Киевпен де, Мәскеумен де тығыз жұмыс істемек. Сосын келесі айда Вашингтонда еуропалық президенттер мен Зеленский қайта бас қоспақ.

Авторлары: Ердана Ержанұлы, Эндрю Фанг