Ақтауда волонтерлер жалғызбасты зейнеткерлерді қамқорлығына алды

Маңғыстау облысында 3 мыңға жуық адам волонтерлік қызметпен айналысады. Олардың ең жасы 14-те болса, ересегі 64 жаста.

Кейбір еріктілер қоғамдық ұйым құрып, әлеуметтік көмекке мұқтаж жандарға бірнеше жыл қатарынан қол ұшын созып келеді. Мысалы, Ақтау тұрғыны жалғыз қалған және мүгедектігі бар 70-тен астам зейнеткерді қамқорлығына алған. 

Иман Досмұханбетовтың есімі маңғыстаулықтарға жақсы таныс. Ол 2010 жылы қоғамдық қор құрған. Содан бері 10 мыңдай адамға көмек көрсеткен. Бірнеше әлеуметтік дүкені бар. Жомарт жүрек тұрғындар киім-кешек, азық-түлік апарып тапсырады. Жиналған заттар мен ас-сусынды еріктілер әлеуметтік осал топтағы отбасыларға жеткізіп береді.

Мағрипа Елбаева, волонтер:

- Осы қайырымдылық қорға келіп, жұмыс істеп жүргеніме 4 жыл болады. Ата-әжелерге ыстық тамақ дайындаймыз. Біз телефон арқылы хабарласа отырып, мұқтаж кісілердің неге мұқтаждығын біліп, адрестеріне жеткізіп беруге тырысамыз. Тамақ келсе тамақтай, киім, ыдыс-аяқты таратып отырамыз.  

Волонтерлер апта сайын жалғызбасты қарияларға ыстық тамақ апарады. Үйін жинап береді. Иман - кәсіби массажист. Мүгедектігі бар бала бағып отырған жанұяларға тегін қызмет көрсетеді. Ата-анаға емдік массаж жасаудың қыр-сырын үйретіп жүр. 

Иман Досмұханбетов, қоғамдық қор жетекшісі:

- Волонтерлік қызметті жалғыз өзім атқармаймын. Менімен бірге 20-дан астам адам сауапты іске жұмылды.Олар әр салада жұмыс істейді. Бастапқыда 20 жалғызбасты зейнеткерді қамқорлығымызға алсақ, қазір олардың саны 70-тен асты.

Бүгін елордада өткен форумда Мемлекет басшысы еріктілер қозғалысына ерекше мән беретінін айтты. Волонтерлікпен айналысу қазақ халқының бойында бар асыл қасиет екенін тағы бір мәрте еске салды. Қазір елімізде 1 ұлттық және 20 аймақтық фронт-кеңсе жұмыс істейді. Еріктілердің саны 300 мыңға жетті. Бір ғана Маңғыстау облысында 3 мыңдай адам волонтерлік қызметпен айналысады.

Авторлары: Талғат Исламұлы, Ренат Досалиев