Қарағанды облысында зейнеткерлерді жұмыспен қамту қадамы

Қарағанды облысында егде жастағы азаматтарды еңбекке тартатын «Алтын жас» және «Күміс жас» бағдарламалары сәтті жүзеге асырылуда. Бұл жобалардың басты мақсаты – зейнет жасына жақындағандарды жұмысқа орналастыру.

Былтыр осы бағдарламалар арқылы 2,5 мыңнан астам адам екі қолға бір күрек тапты. Зейнет жасына жеткен жандар жаңа мамандық игеріп, қабілеттерін дамытып жатыр. Мемлекет пен жұмыс беруші қолдау көрсетіп, жалақыны субсидиялайды. Осылайша, қартайған шағында адам өзіне сенімін жоғалтпайды. Өмірден тыс қалмай, қоғамға пайда келтіреді.

Жаркынай Айтуова Алматыдан Қарағандыға көшіп келген. Алғашында өзі жұмыс іздеген, бірақ нәтиже шықпағанын айтады. Кейін Еңбек мобильділігі орталығы арқылы «Күміс жас» бағдарламасына қатысып, тігін цехына жұмысқа орналасқан.

Жарқынай Айтуова, тігінші:

- Жаныма жақын осы ілмек қазақша тігін фабрикасы, ою өрмекті өзіме, жүрегіме жылы қабылдадым. Сосын осында жұмысқа келдім. Мансап орталығы осы жаққа бағыттады. Жұмыс тауып берді.

Ал Ләззат Асылбекова «Алтын жас» бағдарламасы бойынша балалар орталығына жұмысқа орналасқан. 42 жыл ауыл мектебінде еңбек еткен зейнеткер ұстаз қалаға көшіп келген соң үйде отырғысы келмеген. Балаларға деген сүйіспеншілігі қайтадан білім саласына жетелегенін айтады. Қазір ол бастауыш сынып мұғалімі болып еңбек етіп жүр.

Ләззат Асылбекова, бастауыш сынып мұғалімі:

- Зейнеткер болсам да еліме, жеріме қызмет ете алатынымды көрсеттім. Төрт қабырғаға қарап отырған адам шаршап қалады. Сондықтан мен өздерін сергек сезіну үшін, тіпті денсаулығын жақсарту үшін адам жұмыс істеуі керек деп ойлаймын.

«Күміс жас» бағдарламасы бойынша әкімдік жұмыс берушілермен келісімшарт жасайды. Үш жыл бойы жалақының бір бөлігін субсидиялайды. Ал «Алтын жас» бағдарламасы аясында жалақыны мемлекет пен жұмыс беруші бірге төлейді.

Нұржан Сыздықов, Қарағанды облыстық еңбек мобильділігі орталығының басшысы:

- 510 адам қысқа мерзімді оқытуға жіберілді. Оның 85-і жұмыс берушінің жұмыс орнында оқып, қалғаны жұмыс берушінің өтінімі бойынша. Қандай мамандық иелеріне сұраныс болады, сол бойынша оқытылып шәкіртақысы, жол ақысы бәрі төленіп, жұмысқа орналастырылады. 

Жаңа мамандықты меңгергісі келетіндер еңбек мобильділігі орталықтары арқылы қысқа мерзімді тегін курстан өте алады. Оқу аяқталған соң жұмысқа орналастыруға да көмек көрсетіледі. Осылайша, Қарағанды облысындағы зейнеткерлер белсенді болып, қоғамға пайда келтіріп, қосымша табыс табуға мүмкіндік алады.

Авторлары: Рүстем Қайратұлы,Лиана Жамлиханова,Сайран Ахамбаев, Аман Хамит