Ақтаулық азамат тұрғын үйдің ауласын гүлзар баққа айналдырды

Ақтау қаласының тұрғыны көп қабатты үйдің ауласын гүлзар баққа айналдырды. 

Владимир Леневский есімді азамат қолда бар құрылыс заттарын пайдаланып фонтан да салып қойған. 

Владимир Леневский жағалаудан әкелген тасын қалап, жақында ғана субұрқақты салып бітті. Сұлулыққа жаны құмар азамат осылайша көптен бері көкейінде жүрген композициялық туындыны аяқтады. 

Владимир Леневский, Ақтау қаласының тұрғыны:

- Субұрқаққа циркуляциялық сорғы орнатылған. Сол арқылы су шашырап, қайтадан ыдысқа құйылып отырады. Яғни шығын жоқ. Он литр су болса жеткілікті. Мен өз ісім арқылы «Таза Қазақстан» акциясына үлес қосқым келді. 

54 жастаға қала тұрғыны ауланы абаттандыруды үш жыл бұрын қолға алған. Бастапқыда бос жатқан жерге топырақ төгіп, әртүрлі жасыл-желек отырғызыпты. Қазір еккен ағашы жайқалып, көпшіліктің көз қуанышы болып тұр.

Нұргүл Орынбаева,  Ақтау қаласының тұрғыны:

- Біздің көршілеріміз ол Володя. Ол өте еңбекқор. Өте қарапайым. Есігінің алдына плитаны, фонтанд  өзінің есігін алдын көгертіп әдемі қып жарқыратып қояды. Өзіміздің көшеміздің қаламыздың көркеюіне жан тәнімізбен әрбір қазақстандық атсалысса құба құп болады. 

Наурыз айынан бері Ақтау қаласында 22 рет «Таза Қазақстан» акциясы ұйымдастырылды. Көпшіліктің көмегімен мыңға жуық көшет егіліп, 282 тонна қоқыс шығарылды. 

Шыңғыс Қалиден, Тамара Степанова, Ренат Дусалиев