Ақтөбе ФК жекешелендіріліп жатыр

Бейбарыс Қабылан жастар арасында әлем чемпионы атанды. Кенияда өтіп жатқан 21 жасқа дейінгілер арасында 87 келі салмақта қарсылас шақ келтірмеді. Ол бас аяғы 5 жекпе-жек өткізіп, бесеуінде де жеңіске жетті.

Отандасымыз алғашқы іріктеу кезеңдерінде Үндістан, Түркия елінің спортшыларын ұтса, жартылай финалда Иран өкілінен айласын асырды. Ал финалдық кездесуде Оңтүстік кореялық таеквондошыны жеңді.

Айта кетейік, әлем чемпионаты 6 желтоқсанға дейін жалғасады. Жарысқа барлығы 75 елден 500-ге жуық спортшы қатысып жатыр.

WADA допингке қарсы кодекске өзгеріс енгізеді

Допингке қарсы кодекске өзгерістер енгізіледі. Бүкіләлемдік антидопинг агенттігінің алтыншы конференциясы Азияда алғаш рет Оңтүстік Кореяның Пусан қаласында өтіп жатыр. Оған 191 елден екі мыңға жуық адам жиналды. Қазақстаннан Туризм және спорт министрлігінің өкілдері қатысты. Мұндай конференция алты жылда бір рет өтеді. Биылғы форумда мамандар 2027 жылы күшіне енуі тиіс допингке қарсы кодекске енгізілетін түзетулерді бекітеді. Кейін оны барлық халықаралық спорт федерациялары мен ұлттық допингке қарсы ұйымдар сақтауға міндетті болады. WADA өкілдерінің айтуынша, жаңа кодекс спортшылардың пікірлерін ескере отырып әзірленген. Қазақстан 2009 жылдан бастап Дүниежүзілік антидопинг агенттігінің мүшесі саналады.

Витольд Банька, Бүкіләлемдік допингке қарсы агенттік президенті:

- 2019 жылы Дүниежүзілік антидопинг агенттігінің бюджеті шамамен 37 миллион доллар болды. Қазір ол екі есеге жуық өсіп, 56 миллионға жетті. Екі жыл бұрын Еуропалық Одақтан алған 1,5 миллион еуро көлеміндегі гранттың арқасында біз құқық қорғау органдары, кеден және ұлттық допингке қарсы агенттіктер арасында оқыту бағдарламасын іске қостық. Жоба нәтижесінде 140 бірлескен операция жүргізілді. Тыйым салынған препараттар мен стероидтердің 800 миллион заңсыз дозасы тәркіленді.

Тұрсынзада Қуанғалиева, Дене шынықтыру және бұқаралық спорт академиясының ректоры:

- Әрбір білім беру бағдарламамызда антидопингке қарсы, жаңағы таза спортқа, «clean sport» дейміз ғой, соған байланысты бізде модуль бар. Сонымен қатар біз WADA-мен бірге Орталық Азияда білім беру хабын ашқымыз келеді. Бұл бізге не береді? Ол бізге жаңағы WADA-ның сертификатталған курстарын қолжетімді етеді. Сол сертификатталған курстары арқылы біз елімізде мамандардың жаңа буынын, сарапшыларды дайындағымыз келеді.

Байсуфинов бас бапкер атанды

Талғат Байсуфинов футболдан ұлттық құраманың бас бапкері атанды. Осыған дейін Қазақстанды уақытша жаттықтырған ол енді ресми түрде жаңа қызметке тағайындалды. Жуырда қос тарап келісімшартқа қол қояды. Байсуфинов келгелі ұлттық құрама ресми 3 матч өткізіп, 5 ұпай еншіледі. Оның басты мақсаты – Қазақстанды ұлттар лигасының B санатына шығару.

«Ақтөбе» ФК жекешелендіріліп жатыр

Тағы бір қазақстандық клуб жаңа инвестормен келісімге келді. «Ақтөбе» футбол командасы жекешендірілетін болды. Қазір клуб басшылығы мен кәсіпкер арасындағы жұмыстардың 80%-і шешілген. Енді ресми қол қою рәсімі қалып тұр. Инвестор Нұрлан Артықбаев Ақтөбені қол астына алғаннан кейін командада бірқатар өзгеріс енгізуді жоспарлап отыр.

Шыңғыс Сенғажин, спорт журналисі:

- Осы уақытқа дейін 5 команда жекеменшікке өтті. Жақын арада тағы 4 команда жекеменшікке өтейін деп жатыр. Олардың қатарында Атырау бар. Олар қазір соңғы келіссөздерін жүргізіп жатыр. Егер Атыраудың база мәселесін шешсе, жеке кәсіпкерлікке өтеді. Одан кейін «Тобыл» бар. Оған 2 кәсіпкер таласып отыр.

Еске сала кетейік, осыған дейін қызылордалық «Қайсар» мен петропавлдық «Қызыл-Жар» және елордалық «Жеңіс» пен қарағандылық «Шахтер» клубтары жекешелендірілген еді. Инвесторлар шамамен 12 млрд теңге көлемінде ақша құйып, академия салуға міндеттеледі.