Ақтөбе облысында Қауіпсіз үй акциясы өтіп жатыр

Ақтөбе облысында құтқарушылар жеке тұрғын үйлерді аралап, өрт қауіпсіздігін қадағалап жүр. Оқыс оқиғалардың алдын алу мақсатында өңірде «Қауіпсіз үй» акциясы өтіп жатыр. Шараға төтенше жағдайлар департаменті өкілдерімен қатар газ тасымалдау қызметі және энергетика саласы мамандары да жұмылдырылған. 

Ақтөбе облысында биыл 472 өрт тіркелді. Қайғылы оқиға салдарынан жеті адам қаза тауып, тоғыз тұрғын түрлі жарақат алды. Құтқарушылар: «Негізінен саяжайларда орналасқан баспаналар жиі өртенеді», - дейді. 

Айбат Жаңабергенов, облыстық ТЖД бастығының бірінші орынбасары:

- Өрттердің негізгі себептері болып жататыны мына тоқтардың ақаулығы және де жылыту аспаптарының, құрылғыларының дұрыс болмауы өрт қауіпсіздігін сақталмауы мәселелері. Соған байланысты осы біздер ТЖД үнемі жұмыстарды кұшейтіп, халыққа түсіндіру жұмыстарын кең көлемде жүргізетін болады. 

Төтенше жағдайлар департаменті өкілдері үйлердің пеші мен мұржаларын тексереді. Ал энергетиктер әр баспананың электр желісін қадағалайды. Мамандар бөлмеге газ немесе ыстың таралғанын жедел анықтап белгі беретін 200 аспапты тегін орнатты. Жылыту маусымы басталғалы 400-ге жуық құрылғы үлестірілген. 

Жомарт Меденин, қала тұрғыны:

- Қауіпсіздікке жауап беру үшін келіп жатыр ғой. Онысы дұрыс енді. Жер жерде өрт болып жатыр, газдан уланып жатыр. Бір жерге кетіп бара жатқанда сөндіріп кетеміз. Счетчиктен сөндіріп, қауіпсіз етіп кетеміз. 

Рейдке полицейлер де қосылды. Қазір өңірде тәртіп сақшыларының қауіпсіздікті қамтамасыз етуге бағытталған жоспарлы жедел алдын алу шарасы өтіп жатыр. 

Абай Жүсіпов, облыстық ПД бастығы:

- Учаскелік инспекторлерге қойылған тікелей міндет - қазіргі таңда баспаналарда кім тұрып жатыр, қандай жағдайда тұрып жатыр, жалдамалы пәтер ме, соның барлығын анықтайды. Бұл рейдтік іс-шара тек қана Ақтөбе қаласында ғана емес, бүкіл облыс деңгейінде ұйымдастырылып жатыр.

Үш күнге жоспарланған «Қауіпсіз үй» акциясы тек саяжайлар, жеке тұрғын үйлермен шектелмейді. Төтенше жағдайлар департаменті өңірдегі қонақүйлер мен жатақхана, хостелдерді тексеріп, тұрғындарға қауіпсіздік ережелері жазылған ескерту парақшаларын таратады. 

Авторлары: Мансұр Есқожин, Болатбек Молдағалиев, Айбек Даутов