Ақмола облысында балаларға арналған экосабақтар өтіп жатыр

Ақмола облысының балабақшалары мен мектептерінде экосабақтар өтіп жатыр, деп хабарлайды 24KZ. Бұл бастаманы өңірдегі 27 білім беру ұйымы қолға алған. Оқушылар мен бүлдіршіндер оқу ғимаратының ішін жасыл-желекке толтырып, алуан түрлі гүл егеді. «Бұл балғындардың экологиялық мәдениетін қалыптастыруға ықпал етеді», – дейді мамандар. Жалпы экошараға екі мыңға жуық бала жұмылдырылған.

Көкшетаудағы №13 мектептің дәлізі кәдімгі гүлзар бақтан кем емес. Мұнда 30-дан астам гүлдің түрі бар. Оқушылар күн сайын осы өсімдіктерді суарып, топырағын қопсытып тұрады.

Бір ерекшелегі осы гүлдің бәрін оқушылар өздері екен. Олар бір жыл ішінде 80 түпке жуық гүл өсірген. Ол үшін арнайы қондырғы да сатып алған.

Малика Еслямбек, оқушы:

- Сіздердің алдарыңызда гидропоника жобасы. Осы жоба арқылы біздің мектебіміз өсімдіктердің түрлерін және санын арттыруға тырысады. Мысалға, осы өсімдікті біз екі ай бұрын отырғыздық. Қарап тұрғандай, тамыры қатты дамыған. Осы тамыр арқылы біз оны топыраққа отырғыза аламыз.

Бұдан бөлек оқушылар тұрмыстық қалдықтарды кәдеге жаратып отыр. Яғни өңделген экологиялық таза материалдардан түрлі бұйымдар жасайды.

Алена Кравцова, мұғалім:

- Пластик құтыларды, картон қағаздарды, түрлі ескі маталарды пайдаланамыз. Осындай жұмыстар арқылы оқушылардың бойында экологиялық мәдениетті қалыптастырғымыз келеді.

Дәл осындай экологиялық жобаларды Ертөстік балабақшасының бүлдіршіндері де қолға алған. Бөбекжайда гүл өсіретін арнайы кабинет ашылған.

Әрсен Кобугун, балабақша тәрбиеленушісі:

- Біздің балабақшада гүлдер өте көп. Біз оларды суарамыз. Қоқыстарды аламыз. Топырақпен жұмыс істейміз. Бәрі көңілді.

Хош иісті гүлдердің бір парасы балалардың ойын бөлмелеріне де қойылған. «Оның балғындарға тигізер пайдасы мол», – дейді тәрбиешілер.

Елена Москаленко, балабақша тәрбиешісі:

- Гүлдер бізге тек әдімілік үшін емес, ауаны тазартуға да көмектеседі. Балғындарға көтеріңкі көңіл күй сыйлайды. Қазір бізде гүлдің 20-дан астам түрі бар.

Жалпы білім беру мекемелеріндегі осындай игі шаралар тек өсімдік өсірумен ғана шектелмей, балаларға экологиялық білім мен тәрбие беруді көздейді. Қазір аймақта әзірге 27  оқу ошағы осы бағытта жұмыс істейді.

Авторлары: Абзал Азаматұлы, Виктор Полянный