Ақтөбе тұрғындары жаңа жылды қалай қарсы алады?

Елде жаңа жылды қарсы алуға дайындық қызу.

Қай жерге барсаңыз да, қарбалас. Көшелер безендіріліп, жер-жерге шыршалар қойылды. Дүкен аралап, сыйлық іздеген адам көп. Көпшілік өткенге көз жүгіртіп, алдағы жылға жақындарымен бірге жоспар құрады. 

Ал Ақтөбе тұрғындары жаңа жылды қалай қарсы алады?

Қамар Артықова төрімізге шыршаны балалар үшін қоямыз дейді. Мерекені сезінсін деген ой. Биылғы жаңа жылдық дәстүр көпбалалы ананың отбасы үшін ерекше болмақ. Себебі жалғызбасты анаға қайырымды жандар үш бөлмелі пәтер сыйлады. Шыршаны өз баспанасында орнатады.

Қамар Артықова, қала тұрғыны:

- Биыл армандарымның орындалып жатқанына Аллаға сансыз шүкір. Осы айналамда жақсы кісілердің барының арқасында осы жетістіктерге жетіп жатырмын деп ойлаймын. Жаңа жылда әр отбасыға тыныштық, татулық, ауызбіршілік тілеймін. Бір бірімізге қуаныш сыйлап, балаларымызға бақытты балалық сыйлайық.

Ол жаңа жыл түні балаларымен бірге орталық алаңға барамын дейді. Айтуынша, спорт пен білімде қатарының алды болған балақайлар үшін бұл мереке есте қалуы тиіс. Ал қалалық мәдениет сарайының әртістері балаларға қуаныш сыйлауға дайын. Мәселен, Гүлжайна Бимырза Ақшақар болады. Оқушы шағынан жаңа жылдың кейіпкерін сомдап жүрген бойжеткен облыстың бас сахнасына  бірінші рет шыққалы тұр.

Гүлжайна Бимырза, қалалық мәдениет сарайының артисі:

- Жаңа жылға өзіміз кішкентай кезден сенеміз. Әлі күнге дейін сенеміз. Өзі бір керемет адамға жылулық беретін, көңіл күй беретін мереке. Ең бірінші атқаратын міндетіміз ол балалардың көңіл күйін көтеру, балаларға ұнау. Сонымен бірге үлкен кісілер де Жаңа жылды асыға күтеді. Бұл жаңа өмірдің бастауы. Сондықтан үлкен жауапкершілік атқарылып отыр. Осы жауапкершілікті үлкен сеніммен атқарып шығамын деп үміттенемін.

Жалпы өңірде 1600-ден астам түрлі шара жоспарланған. Облыс орталығы мен аудандарда 200 дей шырша орнатылып, безендірілді. Басты мерекелік шара «Қазақ халқына мың алғыс» стелласы маңында өтеді.

Алтынай Юнисова, облыстық мәдениет, архивтер және құжаттар басқармасының басшысы:

- Қала аумағында 12 жыл кейіпкерлерінен құрылған бес құттықтау керуені ұйымдастырылады. Жалпы Ақтөбе қаласының орталығында ұйымдастырылатын шарада үш жүзге жуық өнер иелері тартылады деп отырмыз және эстрада жұлдыздары да осы шараға шақырылып отыр. 

Жаңа жыл қарсаңында қаладағы сауда орындары мен ойыншық дүкендері адамға толы. Әдеттегідей мерекелік дастарханға қажетті азық-түлік пен жақындарына сыйлық іздегендер көп. Себебі көпшілік жаңа жылды отбасылық мейрам дейді. 

БЛИЦ

- 2025 жыл өте жақсы жыл болды. Балаларым үйлі болды. Өзім жақсы-жақсы марапат иесі болдым. Жақсы жаңалықтарымен есте қалды. Өте ризамын 2025 жылға. 2026 әрине армандарым көп. Бәрі орындалсын, балаларым аман болсын. Халқымыз, еліміз тыныш болсын деймін. аспанымыз ашық болсын.

- Осы жылы өзімнің отбасыммен қарсы алатын боламыз. Дәстүр сол. Одан әрі қарай көшеге шығу. 2026 жылы тағы да әрі қарай да даму. Тек қана қаржылай емес, рухани, білім жағынан. Келе жатқан бала-шағаларымыз аман болсын. Сол ең басты тілегім.

- 2025 жыл Аллаға шүкір жақсы өтті. Ешқандай жамандық болған жоқ. Жаңа жылдан үміттенеміз жақсы болсын деп. Елімізде тыныштық болсын деп.

Көпшілік жаңа жылда аста төк дастархан жаюды азайтқан. Ең бастысы – мерекені жақындармен бірге көңілді өткізу. Ал демалыс күндерін табиғат аясында өткізуді жоспарлап қойған.

Мансұр Есқожин, Болатбек Молдағалиев, Айбек Даутов