Ақтөбеде әлі де сұйытылған газ тапшы

ҚР Энергетика министрлігі қазан айында Ақтөбе облысына 10 282 тонна сұйытылған газ бөлді. 1-14 қазан аралығында өңірдегі газ құю бекеттеріне 4 824 тонна газ жеткізілді. Бұл бөлінген сұйытылған газдың 47% тең. 

— Бүгінде жергілікті зауаттар автотасымал арқылы 366 тонна газ жөнелтті. Оның 112 тоннасы «СНПС-Ақтөбемұнайгаз» АҚ-ы, 115 тоннасы «ҚазақОйл-Ақтөбе» ЖШС-і, 139 тоннасын «Gas Processing Company» ЖШС-і бөлді. Қазіргі кезде газ құю бекеттерінде көлік кезегі бар. Бұл жағдай өңірге бөлінген сұйытылған газ көлемінің аз болуынан туындап отыр. Негізі облысқа ай сайын 16 мың тонна газ керек. Қазан айында бөлінгені әдеттегіден 30% аз, — деді Ақтөбе облыстық кәсіпкерлік басқармасының басшысы Алмас Салықбаев. 

Ақтөбе облысы әкімдігі сұйытылған газ көлемі жеткіліксіз екенін айтып, ҚР Энергетика министрлігімен келісім жүргізді. Сөйтіп «СНПС-Ақтөбемұнайгаз» АҚ-нан 972 тонна, Шымкент қаласындағы «Петро Қазақстан Ойл Продактс» ЖШС-нің зауытынан 864 тонна сұйытылған газ бөлінді. 

— Қазіргі уақытта жөнелту және жеткізу жұмыстары қалыпты режимде іске асып жатыр. Осыған байланысты облыс тұрғындарынан аталған жағдайға түсіністік танытуды сұраймыз, — деді Алмас Салықбаев. Оның айтуынша, Атырау мұнай өңдеу зауытындағы жөндеу жұмыстары кезінде Ақтөбеден Ақтауға газ бөлінді. Сұйытылған газды «СНПС-Ақтөбемұнайгаз» АҚ-ы жөнелтті. Бекеттердегі жұмысшылардың айтуынша, сұйытылған газ жеткізілген кезде кезек көбейеді. Ол кезде кез келген адам сатып ала алады. Ал резервуарда газ көлемі азайған кезде тек талон арқылы сатуға шығарылады.

Еске салсақ, биыл шілде, қыркүйек айында да Ақтөбеде газ тапшылығы сезілді. Газ құю бекеттерінде кезек көбейіп, көбінде талон арқылы сатты.