Ақтөбеде бірінші тоқсанда 400 ге жуық адам қылмыстық жауапқа тартылды

Ақтөбе облыстық соты бірінші тоқсанды қорытындылады. Үш ай ішінде соттарда 505 айыпталушыға қатысты 444 қылмыстық іс қаралды. Оның ішінде 393 адамға қатысты 348 іс бойынша үкім шығарылған. Үш айыпталушы ақталып, сот залынан босап шықты. Ақтөбе облыстық соты баспасөз қызметінің хабарлауынша, сотталғандар арасында бас бостандығынан айыру жазасына кесілгендердің үлесі 10,7% құрады.

— Азаматтық іс саны көбейді. Облыс соттары 6 390 істі қарады. Өткен жылдың сәйкес кезеңімен салыстырғанда мыңға жуық іске артық. Оның ішінде 34,6% жеңілдетілген іс жүргізу тәртібімен қаралды. Ал 40% жуығы медиация арқылы шешілді. Сонымен бірге бірінші тоқсанда облыс соттары 355 әкімшілік істі аяқтады, яғни өсім 22,5% құрап отыр. Оның 35,2% қаралып, шешім шығарылды. Облыстық сот төрағасының міндетін атқарушы Әлібек Ахметов істерді қарау сапасын арттыруға және сот шешімдерінің күшін жоюға, өзгертуге жол бермеуге бағытталған бірқатар міндеттер қойды, — деп хабарлады Ақтөбе облыстық сотының баспасөз қызметі.

Еске салсақ, наурыз айында Ақтөбе қаласында және аудандарда 12 судья қызметке кірісті. Ал облыстық сот төрағасы басқа қызметке ауысты. Әзірге облыстық соттың жаңа төрағасы тағайындалмады.