Ақтөбеде Harmony Rider Technology қаржы пирамидасын ұйымдастырушылар сотталды

Тергеуді ҚР Қаржы мониторингі агенттігі Ақтөбе облысы бойынша департаменті жүргізді.

Ведомство мәліметінше, 2024 жылы бір топ тұлға өзін шетелде электросамокаттарды сатып алып, жалға берумен айналысатын халықаралық компания ретінде таныстырып, қаржы пирамидасының жұмысын ұйымдастырған.

Нақтысында салымшыларға төленетін табыс жаңа қатысушылардан тартылған қаражат есебінен қалыптасқан.

- Азаматтарды тарту мақсатында әлеуметтік желілер мен мессенджерлер арқылы жарнама жүргізіліп, офлайн кездесулер мен таныстырылымдар ұйымдастырылған. Заңдылық көрінісін қалыптастыру үшін Ақтөбе қаласында кеңсе жалға алынып, үгіт-насихат жұмыстары жүргізілген.

Салым сомасы 350-ден 20 000 АҚШ долларына дейін болған, ал уәде етілген табыс тәулігіне 12-ден 690 АҚШ долларына дейін жеткен.

Қаражатты заңдастыру үшін күдіктілер криптоәмияндар арқылы ақша айналымын жүргізіп, кейін оны айырбастап, банк шоттарына аударып отырған, - деп түсіндірді агенттіктен.

Заңсыз әрекеттер нәтижесінде қаржы пирамидасына 115 салымшыдан жалпы сомасы 197 млн теңгеден астам қаражат тартылған.

Аталған қаражат есебінен ұйымдастырушылар 3 автокөлік сатып алып, оның бірін туысының атына рәсімдеген.

Сот үкімімен ұйымдастырушылар 6 жылға дейін бас бостандығынан айырылды.

Сонымен қатар сот шешімімен 3 автокөлік мемлекет кірісіне тәркіленді.

Сот үкімі заңды күшіне енді.

Айта кетейік, бұған дейін 380 адам Sirius Energy қаржы пирамидасының құрбаны болғаны хабарланды.