Ақтөбеде колледждердің материалдық техникалық базасы жаңартылуда

Ақтөбедегі колледждердің материалдық техникалық базасы жаңартылып жатыр.  

Қажетті құрал- жабдықпен қамтамасыз етіп, зертханалар салуға бюджеттен 900 млн теңге бөлінді. Енді студенттер теориялық білімін тәжірибемен ұштастырады. Өндіріс орындарынан бөлек, арнайы полигондарда тағылымдамадан өтеді. Игі бастама «Жұмысшы мамандықтар жылы» аясында қолға алынды.

Мына оқу-жаттығу полигонында болашақ энергетиктер электр қуатын өндіріп, желімен жұмыс істеуді үйренеді. Полигонда күн электр генераторы, тоқ желісі тартылған бағаналар мен қосалқы станциялар орнатылған.

Ғалымжан Ізімов, колледждің арнайы пәндер оқытушысы:

- Студенттердің оқу-өндірістік тәжірибелері, арнайы практикалық сабақтары оқу полигонында ұйымдастырылады. Бұл жердегі барлық жабдықтар нақты өндірістік жабдықтарға сәйкестендірілген. Яғни теңестірілген.

Бірінші және екінші курс студенттері  биіктігі екі метр бағанаға шығып аспалы желілерде жұмыс істеуге машықтанады. Ал соңғы курста күрделі жабдықтарды игеруі тиіс. 

Нұрәлі Әбдіраманов, колледж студенті:

- Бұл полигонды толықтай студенттер жинап шыққан. Мен осы АВР-ды жинадым. Яғни бұл күн энергиясын алып, аккумуляторда сақталады. Ол аккумуляторда сақтағаннан кейін потрибительдерге тоқтаусық тоқпен қамтамассыз етеміз. Яғни барлық жұмыста кездесетін жағдайлар қамтамассыз етілген. Бұл полигон мамандығымызды толық меңгеруге көмек береді.

Колледжде 10 жұмысшы мамандығы бар. Қазір шамамен 2 500 жас білім алып жүр. Сондықтан жыл соңына дейін тағы екі арнаулы кабинет жабдықтау көзделген. Жалпы «Жұмысшы мамандықтары жылы» аясында облыстағы 9 колледжге қаржы бөлініп, материалдық-техникалық базасы нығайтылуда.

Жеңісгүл Мұхамбетпаизова, колледж директоры:

- Үлкен қолдау жасап әр колледжге 100 млн-нан қаржы бөлген болатын. Осы орайда екі мамандық бойынша, біреуі «Мұнай және кен орындарын пайдалану» және «автоматтандыру және басқару» деген екі мамандық бойынша үлкен материалдық-техникалық базаны нығайту барысында мүмкіндіктер алдық.

Өңірдегі білім ордаларында биыл жұмысшы мамандарды даярлауға басымдық берілген. Талапкерлерге бөлінген грант көлемі де былтырмен салыстырғанда екі есе артты. Нәтижесінде 4 мыңнан астам мектеп түлегі жұмысшы мамандығын таңдады.

Авторлары: Мансұр Есқожин, Болатбек Молдағалиев, Айбек Даутов