Ақтөбелік жігіт анасының 10 миллион теңгесін ұрлаған

АСТАНА, 6 наурыз – Sputnik. Ақтөбеде 25 жастағы жұмыссыз азамат анасының банк қосымшасын өз нөміріне тіркеп, шотындағы 9 миллион 899 мың теңгені ұрлаған, деп хабарлайды "Диапазон".

Тергеу дерегі бойынша әйел инсульттен кейін ауыр жағдайда болып, смартфонның функциясын толық түсінбеген. Ұлы оның шотына қол жеткізіп, бірнеше күнде қаражатты өз шотына аударған.

Сотта қылмыскер кінәсін мойындамай, анасынан рұқсат сұрағанын, анасы басын изеу арқылы келісім бергенін айтқан. Сонымен қатар, ұрланған қаражатты кейін қайтаруға уәде бергенін мәлімдеді.

Алайда сот анасы ешқандай рұқсат бермегенін анықтады. Ұрланған 10 миллион теңге кәсіппен айналысатын анасының бауырына тиесілі болып шықты.

Тергеу барысында анасына қарайтын әлеуметтік қызметкер де куәлік берді. Ол әйелдің инсульттен кейін сол жақ бөлігінің сал болып қалғанын, бірге тұрған кезінде ұлы жиі қорлағанын, зейнетақысын алып кеткенін, науқас кейде азық-түлікті қарызға алуға мәжбүр болғанын айтты.

Сот үкімі бойынша қылмыскер 6 жыл 6 айға бас бостандығынан айырылды. Сонымен қатар, ол жәбірленушіге қаражатты өтеуге міндеттелді.