Ар намысыма тиді : сотта Атыраудағы қанды қылмыстың мән жайы белгілі болды

АСТАНА, 18 мамыр – Sputnik. Атырауда бір отбасының төрт мүшесін өлтірді деп айыпталған Сұлтан Сәрсемәлиевке қатысты соттың алдын ала отырысында қылмыстың хронологиясы жарияланды, деп хабарлайды Sputnik Қазақстан Atyrautoday агенттігіне сілтеме жасап.

Наурыз Мұқанғалиевтің өлімі

Тергеу материалына сәйкес, Сәрсемәлиев қайын ағасы Наурыз Мұқанғалиевпен жиі жанжалдасып жүрген. Мұнайшы шағын ауданындағы жеке үйде болған жанжалдың соңы төбелеске ұласқан. Сол сәтте Сәрсемәлиев асүйден пышақ алып, қайын ағасына бірнеше рет соққы жасаған. Наурыз Мұқанғалиев алған жарақатынан оқиға орнында көз жұмған.

Тергеу дерегінше, Сәрсемәлиев қылмыстың ізін жасыру үшін мәйітті аулаға көміп, кейін барлық айғақты жоюға тырысқан.

Қайын ағасының атына кредит рәсімдеген

Айыптау нұсқасына сәйкес, Сәрсемәлиев қайын ағасын өлтіргеннен кейін оның телефоны арқылы 4 млн теңге кредит рәсімдеген. Одан кейін WhatsApp арқылы енесі Нәсіп Өтешқалиеваға Наурыздың атынан хабарлама жіберіп, 350 мың теңге сұратқан. Өтешқалиева ақшаны такси жүргізушісі арқылы беріп жіберген. Кейін жүргізуші қаражатты Наурыздың нөміріне аударған.

Ата-енесін де өлтірген

Тергеу мәліметінше, 2025 жылдың қараша айында Сәрсемәлиев отбасымен бірге Жангелдин ауылындағы ата-енесінің үйіне барған. Сол жерде тағы тұрмыстық жанжал шыққан.

Айыптау тарабының дерегінше, ол алдымен қорада жүрген енесі Нәсіп Өтешқалиеваны пышақтап өлтірген. Кейін қайын атасы Мақсот Қарабалинге шабуыл жасап, оның денесін жұбайының мәйітімен бірге қораға көмген.

Мейрамгүл Қарабалинаның өлімі

Тергеу материалына сәйкес, Сәрсемалиев қайын апасы Мейрамгүл Қарабалинаны да өлтірген. Іс материалдарында айтылғандай, күндіз үйіне келген кезде Қарабалина сіңлісімен сөйлесіп отырған. Үйде кәмелетке толмаған бала да болған.

Сол кезде тұрмыстық жағдай мен азық-түлік тапшылығына байланысты жанжал туындаған. Тергеу нұсқасы бойынша, Сәрсемәлиев жанжал кезінде пышақ алып, Қарабалинаға шабуыл жасаған. Әйел алған жарақатынан оқиға орнында көз жұмған.

Сәрсемәлиев кез келген жазаға дайын

Сотта Сәрсемәлиев ең ауыр жазаға дайын екенін мәлімдеді.

"Жазаның ең ауыр түріне дайынмын. Бұл жағдайға ата-енемнің әйелімді және бес баламды менен тартып алғысы келуі себеп болды. Бұл менің ар-намысыма тиді. Соңғы уақытқа дейін отбасымды сақтап қалуға тырыстым", - деді ол.

Оның сөзінше, әйелінің туыстары оған үнемі қысым көрсетіп, психологиялық тұрғыдан қатты әсер еткен.

"Содан кейін осындай қылмыстарға бардым", – деді айыпталушы сотта.

Айта кетері, Сәрсемәлиев Қылмыстық кодекстің бірнеше бабы бойынша, атап айтқанда екі немесе одан да көп адамды өлтіру, ұрлық, алаяқтық және құжаттарды заңсыз иемдену айыптарымен сот алдында жауап беріп жатыр.