Бұның барлығы жалған : Атыраудағы қанды қылмыстың мән жайы айтылды

АЛМАТЫ, 13 қаңтар – Sputnik. Атырау облысы Жангелді ауылында мәйіті табылған ерлі-зайыптыға қатысты тергеу жалғасып жатыр.

Облыстық полиция департаменті баспасөз қызметінің мәліметінше жоғалған отбасы екі ай бойы іздестірілді деген ақпарат шындыққа жанаспайды. Туыстарынан полицияға арыз былтыр 25 желтоқсанда ғана түскен.

"Бас кезінде төрт адамның із-түзсіз жоғалуына қатысты қылмыстық іс қозғалса, кейіннен оған екі адам қосылды. Екі адамның мүрдесі анықталды, екі жәбірленушіге қатысты іздеу жұмыстары жүріп жатыр. Тағы екі адамға халықаралық іздеу жарияланды. Оның бірі із-түзсіз жоғалған осы отбасының қызы, ал оның күйеуіне күдікті ретінде халықаралық іздеу жарияланды", - дейді Атырау облысы полиция департаменті Ақпараттық саясат бөлімінің бастығы Мейірім Ердәулет.

Ведомство өкілі халықаралық іздеу қай мемлекеттерде жүріп жатқаны туралы ашып айтпады.

"Бұл ақпарат ашып айтылмайды, өйткені күдікті ізін суытуы мүмкін. Тергеу барысына кедергі келтіреді. Негізі халықаралық іздестіру әлемнің барлық елінде жүргізіледі. Өзбекстанда жүргені белгілі болды деп айтылды. Бірақ басқа елдер туралы ресми айтылмады, басқа елдердің тізімі бар", - дейді ол.

Отбасындағы қыздың дене мүшелері әр жерден табылды деген ақпарат шындыққа жанаспайды.

"Отбасындағы қыздың мүшелері әр жерден табылғандығы туралы ақпарат тарап жатыр. Бұның барлығы жалған. Полиция соңғы бірнеше айда қала аумағында іздеу жұмыстарын жүргізіп жатыр. Септиктер, шұңқырлар, адам аяғы аспайтын жерді тінтіп жатыр", - деп атап өтті Мейірім Ердәулет.

Күдіктінің әйелі жанармай құю станцияларындағы бейнекамераларға түсіп қалғаны туралы ақпаратты полиция растады.

"Ерлі-зайыптыны тұншықтырған екен деген сияқты әртүрлі ақпарат жүр. Олардың денесінде пышақ ізі бар. Шаншып тығу арқылы дене жарақат салынған. Полиция мүрделерді сот медициналық-экпертизадан өткізді. Жауабын күтіп отырмыз. Жәбіренушілердің өліміне нақты қандай фактор себеп болды, тек сараптамадан соң айтамыз", - дейді полиция өкілі.

Қылмысқа өзге де адамдардың қатысы бар-жоғы тексеріліп жатыр.

Еске сала кетейік, Атырау облысында бүтін бір отбасы із-түзсіз жоғалып кетті. Отбасының ата-анасының денесі үй маңынан табылды.