Аралдың табанынан тұщы су шықты

Қазақстанның орманшылары жыл соңына дейін Арал теңізінің аймағына бір миллионнан астам түп сексеуілді егу жұмыстарын аяқтайды.

Жуырда теңіз табанынан құдық қазылып, 500 метр тереңдіктен тұщы су шықты. Тіршілік нәрі көшеттерді суғару үшін пайдаланылады. Ташкентте Орталық Азия елдері орман шаруашылығының мамандары бас қосып, аймақтағы экологиялық мәселелерді шешу жолдарын қарастырды.

Арал экологиясымен күресудің бірден-бір жолы ағаш егу. Қазір құрғаған теңіз табанында бұл жұмыстар қызу жүріп жатыр. Қазақстан тарапы жыл соңына дейін 1,1 млн түп сексеуіл көшетін отырғызбақ. Жас талдарды суғару үшін 500 метр тереңдіктен құдық та қазылған.   

Бағдәулет Амангелдинов, ҚР Орман шаруашылығы және жануарлар дүниесі комитетінің бас сарапшысы:

- Арал теңізінің құрғаған табанында, Қазалыда питомник құрылды. Одан бөлек құрғаған жерінде питомник салу жоспары бар. Қазір құдық қазу жұмысы аяқталды. 0450 стык 0510 бес жүз метрден су шықты. Тұщы су көшеттерді суаруға жақсы.

Мемлекет басшысының 2030 жылға дейін елде 2 млрд түп ағаш егу тапсырмасы бар. Жобаны халықаралық сарапшылар жоғары бағалап, жұмыстардың қарқынды жүріп жатқанын ерекше атап өтті. Жалпы Орталық Азия аймағын жасылдандыру бастамасы аймақтық экология орталығына жүктеліп отыр. 

Нодырбек Рахымжонов, Орталық Азиядағы аймақтық экология орталығының филиал директоры: 

- Біздің орталық жобаның атқарылуын қадағалайтын болады. Ол үшін ортақ портал құрылып, әрбір елдің жасап жатқан жұмыстары мен жоспарлары белгіленеді. Орталықтың тағы бір міндеті – ол көмек көрсету. Егер түйіткілді мәселелер туындайтын болса, біздің мамандар шешу жолдарын көрсетіп, жобаның нәтижелі шығуына атсалысады.

Орталық Азия елдері соңғы жылдары көгалдандыру жұмыстарына айрықша назар аударып жатыр. Мамандардың жариялаған есептері соған дәлел. Оған қоса, аймақта экология мәселесі де жылдан жылға ушығып барады. Оны ауыздықтаудың бір амалы көптеп ағаш егу.                                                                                                                                 

Дулат Нуркин