Археологтар Петропавл маңындағы ерекше олжаны зерттеп жатыр

Солтүстік Қазақстан облысындағы Бескөл ауылы маңында жүргізілген қарапайым жер қазу жұмыстары кезінде күтпеген олжа табылды. Экскаваторшы карьерден адам сүйектерін тауып алды, оның қасынан мамандар мұз дәуірінде өмір сүрген жүндес мүйізтұмсықтың бас сүйегі мен сүйектерін анықтады. Полиция тексеріс бастады, ал археолог Анатолий Плешаков табылған олжаны қарап шығып, Tengri Life басылымына бұл туралы не белгілі екенін айтып берді.

Табылған олжа туралы не белгілі?

Оқиға Қызылжар ауданындағы Бескөл ауылы маңында болған. Карьердегі жұмыс кезінде экскаваторшы адамның қаңқа сүйектеріне тап болды.

Полиция өкілдері әзірге қылмыстық сипаттағы белгілер анықталмағанын хабарлады.

"Қаңқа сүйектерінің табылу фактісі бойынша полиция материал тіркеді. Қылмыстық сипаттағы белгілер анықталған жоқ. Сүйектердің шығу тегі мен басқа да мән-жайларды анықтау үшін тексеріс тағайындалды", - деп хабарлады СҚО Полиция департаменті.

Бескөл ауылынан табылған адам сүйектері. Фото: СҚО ПД

Сүйектердің кімге тиесілі екені және басқа да жағдайлар тексеріс қорытындысы бойынша анықталуы тиіс.

Археолог Анатолий Плешаков табылған заттарды зерттеп үлгерді. Оның айтуынша, сүйектердің бірі осы өңірде біздің заманымыздан бұрын XII мыңжылдыққа дейін өмір сүрген жүндес мүйізтұмсыққа тиесілі.

"Бескөл ауылы маңынан табылған бұл бас сүйек пен бірнеше сүйек бір кездері осы жерде мекендеген жүндес мүйізтұмсыққа тән. Шамамен біздің заманымыздан бұрын XII мыңжылдыққа дейінгі кезең деуге болады. Бұл - мамонттар заманы, мұз дәуірі. Жүндес мүйізтұмсықтың көлемі мамонттан сәл кішірек, ал аяқтары қысқалау келеді", - деді археолог.

Маманның айтуынша, табылған екі адамның (еркек пен әйел) бас сүйегі мүйізтұмсық сүйегі жататын кезеңнен емес көрінеді. Дегенмен, болжам бойынша, әйел адамның бас сүйегі сол дәуірге тиесілі болуы ықтимал.

"Адам сүйектеріне қатысты әзірге нақты ештеңе айту мүмкін емес - олар мамонттар дәуіріне жатпайтын сияқты. Тек әйел адамның бас сүйегінің жасы күмән тудырады, бәлкім, ол мамонттар заманына тиесілі болар", - деп бөлісті ол.

Бірақ бұл туралы кесіп айту әлі ерте. Археологтың пікірінше, адам сүйектерінің нақты қай уақытқа жататынын анықтау үшін арнайы зерттеу қажет.

Анатолий Плешаковтың сөзінше, Солтүстік Қазақстан ежелгі жануарларға байланысты олжаға бай. Былтыр ғана мамандар мамонт сүйектері табылған төрт орынды тіркеген.

Соның бірі қыркүйекте болды. Ол кезде Солтүстік Қазақстан облысының тұрғыны Бәйтерек ауылы маңында балық аулап жүріп, кездейсоқ мамонттың дәу сүйегін тауып алған.

Айта кетейік, жақында Түркістан облысындағы тасжол жиегінен археологтар 1500 жыл бұрынғы жәдігерлерді тапты. Зерттеушілер ежелгі тұрғын үйдің қалдықтарын, қыш ыдыстар сынығын, темір еңбек құралдары мен ежелгі пешті тапқан.

Сондай-ақ мамандар ортағасырлық қала бөліктері - цитадель, шахристан мен рабадты анықтады.

Бізді Google-дың негізгі дереккөздер тізіміне қосыңыз