Әскери теңіз туының көтерілгеніне 30 жыл: Каспий жағалауында салтанатты шара өтті

АСТАНА, 15 тамыз – Sputnik. Ақтау қаласында Әскери-теңіз күштері туының көтерілгеніне 30 жыл толуына арналған салтанатты іс-шара өтті, деп хабарлайды Sputnik Қазақстан.

30 жыл бұрын Каспий теңізінің жағалауында тәуелсіз Қазақстанның Әскери-теңіз күштерінің туы алғаш рет көтерілген болатын. Осы тарихи сәттен бастап еліміздің теңіздегі мемлекеттік шекарасын, егемендігі мен ұлттық мүдделерін қорғауға бағытталған отандық әскери флоттың қалыптасу жолы басталды.

© Photo : Пресс-служба акима Мангистауской области Республики КазахстанКаспий жағалауында салтанатты шара өтті

Каспий жағалауында салтанатты шара өтті

© Photo : Пресс-служба акима Мангистауской области Республики Казахстан

Облыс әкімі Нұрдәулет Қилыбайдың айтуынша, 30 жылдың ішінде Әскери-теңіз күштері қалыптасудың үлкен әрі абыройлы жолынан өтті.

"Бүгінде бұл – жауынгерлік даярлығы жоғары, заманауи білімі мен мол тәжірибесі бар кәсіби әскери құрылым. Қазақстанның Әскери-теңіз күштерін құрудың бастауында тұрған ардагерлерге ерекше алғысымды білдіремін. Сіздердің қызмет жолдарыңыз – кейінгі ұрпақ үшін ерліктің, Отанға және әскери борышқа адалдықтың үлгісі. Сіздер қалыптастырған әскери қызмет дәстүрлері – баға жетпес мұра әрі еліміздің теңіздегі қауіпсіздігін одан әрі нығайтудың берік негізі", – дейді Қилыбай.

© Photo : Пресс-служба акима Мангистауской области Республики КазахстанКаспий жағалауында салтанатты шара өтті

Каспий жағалауында салтанатты шара өтті

© Photo : Пресс-служба акима Мангистауской области Республики Казахстан

Салтанатты шара барысында әскери оркестрдің сүйемелдеуімен Қазақстан Республикасының Мемлекеттік Туы мен Әскери-теңіз күштерінің туы көтерілді. Ал концерттік бағдарламадан кейін қатысушылар мен қонақтарға әскери кемелер таныстырылып, Әскери-теңіз күштерінің экипаждары мен әскери техникасы көрсетілді.

Шараға ҚР Қарулы күштері Әскери-теңіз күштерінің бас қолбасшысы, 1-ші дәрежелі капитан Қанат Ниязбеков, әскери қызметшілер, Әскери-теңіз күштерінің ардагерлері мен жеке құрам қатысты.