Астана автобустарындағы жолақы 1 желтоқсаннан бастап 150 теңгеге дейін қымбаттауы мүмкін

Астанада қоғамдық көлікте жол жүру құнын көтеру ұсынылып отыр. 1 желтоқсаннан бастап қолма-қол ақшасыз төлеу тарифі 110 теңгеден 150 теңгеге дейін өсуі мүмкін, деп хабарлайды Tengrinews.kz Астана әкімдігіне сілтеме жасап.

Әкімдік бағаның өсу себебін тасымалдаушылар шығынының артуымен түсіндіреді. Қала билігі қазіргі тарифті қоғамдық көлік жұмысына жұмсалатын шығындарды жабуға, автобус паркін жаңартуға және бағыттар желісін дамытуға жеткіліксіз деп санайды.

Әкімдік 2014 жылы елордалық автобустарда жол жүру құны 90 теңге болғанын еске салды. 12 жыл ішінде тариф тек бір рет қайта қаралған - қазір бірреттік жол жүру құны 110 теңгені құрайды.

Бұл ретте әкімдік деректері бойынша тасымалдаушылардың шығындары осы уақыт ішінде айтарлықтай өскен. Мәселен, дизель отынының литрі 107 теңгеден 329 теңгеге дейін, яғни үш еседен аса қымбаттаған. 2014 жылы орташа есеппен 100–150 мың теңге болған жүргізушілердің жалақысы қазір автобус класы мен жұмыс режиміне байланысты 700 мың теңгеге дейін жетеді.

Сондай-ақ қосалқы бөлшектердің, шиналардың, аккумуляторлардың бағасы, автобустарды күтіп ұстау мен жөндеу, сонымен қатар жаңа көлік сатып алу құны да артқан.

Дегенмен, жол жүруге арналған қолданыстағы жеңілдіктерді сақтап қалу жоспарланып отыр. Астанада зейнеткерлер, көпбалалы отбасылар мен аналар, мүгедектігі бар жандар және басқа да жеңілдігі бар санаттар қоғамдық көлікті тегін пайдалана алады. Сонымен қатар, 2020 жылдың наурызынан бастап Астанада оқитын 18 жасқа дейінгі балалар үшін тегін жол жүру жүйесі жұмыс істейді.

Әкімдік есептеулері бойынша, 2024 жылы бір рет жол жүрудің орташа өзіндік құны қазіргі тарифтен әлдеқайда жоғары. Сондықтан 1 желтоқсаннан бастап қолма-қол ақшасыз төлеу кезінде жол жүру құнын 150 теңге деңгейінде белгілеу ұсынылады.

Еске сала кетейік, 1 тамыздан бастап Tarlan Astana жеңіл рельсті көлік желісінде кеңейтілген тарифтер жүйесі енгізілді. Жол жүру тарифтері, сондай-ақ бекітілген сапарлар саны бар тарифтер іске қосылды. Тарифтер туралы толығырақ: сілтеме бойынша оқыңыз.

Бізді Google-дың негізгі дереккөздер тізіміне қосыңыз