Астана Су Арнасы 2026 жылдан бастап су тарифін 40% ға арттыруды ұсынды

Астанадағы коммуналдық кәсіпорын «Астана Су Арнасы» 2026 жылдан бастап су мен кәріз тарифтерін шамамен 40%-ға көтеруді ұсынды. Бұл туралы кәсіпорынның экономика және қаржы жөніндегі орынбасары Назира Смаилова елордалық Табиғи монополияларды реттеу комитеті департаментінде өткен қоғамдық тыңдау барысында мәлімдеді, деп хабарлайды Arasha.kz.

Бүгінде Астанада ауыз судың орташа тарифі 158 теңге (ҚҚС-сыз). 2026 жылдан бастап оны 68 теңгеге көтеру, яғни 43%-ға арттыру жоспарланып отыр, деп жазды bes.media.kz.

Жаңа тарифтер мынадай болмақ:

Халық үшін: 94 → 135 теңге (+43%)

Жылу энергетикасы үшін: 258 → 368 теңге (+43%)

Заңды тұлғалар мен бюджеттік ұйымдар үшін: 358 → 503 теңге (+41%)

Кәріз (су бұру) қызметі үшін де тариф өседі:

Халық үшін: 102 → 147 теңге (+44%)

Жылу энергетикасы үшін: 311 → 448 теңге (+44%)

Заңды тұлғалар мен бюджеттік ұйымдар үшін: 400 → 562 теңге (+43%)

Техникалық судың бағасы да 53 теңгеден 60 теңгеге (+12%) дейін өседі.

2027 жылдан 2030 жылға дейін тарифтер жыл сайын шамамен 11% деңгейінде артып отырады.

Назира Смаилованың айтуынша, 2026 жылға арналған шығындар құрылымы 41 млрд теңгені құрайды. Тарифтің өсуіне бірнеше негізгі себеп бар:

Еңбекақы қоры (19%) – қызметкерлердің орташа жалақысы 389 мыңнан 545 мың теңгеге дейін көтеріледі, штат саны 362 адамға ұлғаяды;

Материалдық шығындар (9%) – реагенттер, жанар-жағармай мен жөндеу материалдарының қымбаттауы, 2026 жылға жоспар – 7,5 млрд теңге;

Электр энергиясы (7%) – шығын көлемі 6 млрд теңге, соңғы екі жылда 2,5 есеге өскен;

Салықтар мен төлемдер (2%) – шамамен 2 млрд теңге, негізінен мүлік салығы;

Сыртқы ұйымдардың қызметі (2%) – күзет, сақтандыру, ІТ-жүйелерді қызмет көрсету шығындары;

Инвестициялық бағдарлама (5%) – 2026 жылға 2,9 млрд теңге, ал 2026–2030 жылдары жалпы 13,6 млрд теңге игеріледі.

2025 жылы Астанада ауыз судың сату көлемі 86 млн текше метр болады деп күтілуде. Оның 75%-ы (55 млн м³) – тұрғындарға тиесілі. Қазір су шығындарының жалпы көлемі 21%, оның ішінде нормативтік шығындар – 16,3%. 2026 жылы бұл көрсеткіш 17,5%-ға дейін артады, себебі жаңа №3 сорғы-фильтрациялық станциясы іске қосылып, су қоймаларын шаю және тазалау қажет болады.

Қазір «Астана Су Арнасы» ұсынған тарифтер бойынша өтінім Табиғи монополияларды реттеу комитетінде қаралуда. Егер жоба мақұлданса, жаңа тарифтер 2026 жылдың 1 қаңтарынан бастап күшіне енеді.