Астанада 300 жаңа автобус жолға шығады

Биыл Астанадағы автобус паркі жаңаланбақ. 300 жаңа қоғамдық көлік сатып алынады.

Қазір 120-ға жуығы қалаға жеткізілді. Қалғаны да 4 ай көлемінде елорда көшелерінде жүреді. Автобустар саны толыққаннан кейін жаңа бағыттар ашылып, аялдамада күту уақыты қысқарады. Бұл туралы қаланың көлік және жол-көлік инфрақұрылымын дамыту басқармасының басшысы айтты. Асхат Қарағойшиннің мәлімдеуінше, келер жылы тағы 300 автобус алу жоспарланған. Осылайша, қоғамдық көлік паркін 2 мың жаңа автобусқа дейін көбейту көзделген. Бұған қоса LRT жобасы сынақтан өтіп жатыр. Алда бұл жобаны Қосшы қаласына дейін ұзарту жоспарланып отыр. Сондай-ақ жол және жол айрықтарын салу, көпірлерді жөндеу жұмыстары жүргізіліп жатыр.

Асхат Қарағойшин, Көлік және жол-көлік инфрақұрылымын дамыту басқармасының басшысы:

- Көктемде жібереміз деген мақсат қойып отырмыз. Оның бағасын әкім айтып кетті. Шамамен 200 теңге болады. Өздеріңіз көріп отырғандай, қазір жаңа пойыздар жүріп жатыр. Наурыз айынан бастап сынақ мерзімін ұйымдастырамыз.