Астанада AI & Digital Bridge 2026 халықаралық IT форумы өтеді

1-3 қазан аралығында Астана қаласында AI & Digital Bridge 2026 халықаралық форумы өтеді.
Бұл шара Орталық Еуразиядағы ең ірі технологиялық оқиғалардың бірі саналады. Қазақстан Республикасының Жасанды интеллект және цифрлық даму министрлігі мәліметінше, бұрын Digital Bridge атауымен өткен форум биыл жаңартылған форматта ұйымдастырылады. Жаңа формат Қазақстанның жасанды интеллект пен цифрлық экономиканы дамытудағы басым бағыттарын көрсетуге бағытталған.

Форумға жетекші технологиялық компаниялар, кәсіпкерлер, инвесторлар, зерттеушілер және мемлекеттік институттар қатысып, цифрлық технологиялар, жасанды интеллект және инновациялық экономиканың болашағын талқылайды.

Бағдарламаның маңызды бөлімдерінің бірі – Жасанды интеллектіні дамыту жөніндегі кеңестің отырысы. Бұл жиында елдегі AI экожүйесін дамыту, ұлттық саясатты іске асыру және жаңа цифрлық экономика үшін кадр даярлау мәселелері қарастырылады.

Сонымен қатар форум аясында дәстүрлі Astana Hub Battle халықаралық стартап-байқауы өтеді. Байқау жас IT-командаларға өз жобаларын таныстырып, инвесторлар мен серіктестер табуға мүмкіндік береді.

Бүгінде форум аймақтағы жетекші технологиялық алаңдардың біріне айналған. Соңғы жеті жылда оған 100 елден 127 мыңнан астам адам қатысып, 1500-ден астам спикер сөз сөйлеген, сондай-ақ 600-ден астам стартап таныстырылған.

Шара EXPO халықаралық көрме орталығы аумағында өтеді. Форумды Astana Hub және Астана қаласының әкімдігі бірлесіп ұйымдастырады.