Астанада денсаулық, білім, әлеуметтік қолдау жүйесіне түсетін жүктеме артып отыр әкім

АСТАНА, 27 желтоқсан – Sputnik. Астанада өмір сүру сапасын арттыру бойынша президент тапсырмасын орындау барысы талқыланды, деп хабарлайды үкіметтің баспасөз қызметі.

Қала әкімі Жеңіс Қасымбектің айтуынша, халық санының тұрақты өсуі инфрақұрылымды алдын ала жоспарлауды қажет етеді.

1 қарашадағы есепке сәйкес, Астана халқының саны 1 622 245 адамға жеткен. Жыл басынан бері халық саны 93 542 адамға артқан, оның ішінде 17 265 адам табиғи өсім есебінен, ал 76 277 адам көші-қон арқылы тіркелген. Халық саны 6,12% өсіп, жыл сайынғы көші-қон ағыны шамамен 100 мың адамға жеткен.

“Бұл жағдай денсаулық сақтау, білім беру, жұмыспен қамту және әлеуметтік қолдау жүйелеріне түсетін жүктемені айтарлықтай арттырып отыр”, - дейді Қасымбек.

Жиында денсаулық сақтау жүйесін дамыту мәселесіне де ерекше көңіл бөлінді. Елордада 277 медициналық ұйым жұмыс істейді. Ғимараттардың тозу деңгейі – 14,7%, медициналық техникамен қамтылуы – 82,4% (ел бойынша орташа көрсеткіш – 86,7%). Сонымен қатар салада кадр тапшылығы да бар. Қазіргі демографиялық жағдайда перзентханалар мен перинаталдық орталықтарды да барынша дамыту қажет. Себебі соңғы 10 жылда елордадағы босану саны 45%-ға артқан.

Отырысқа төрағалық еткен вице-премьер Аида Балаева медициналық көмек көрсетудің маңыздылығын ерекше атап өтті.

“Медицина бақылаусыз жағдайда жұмыс істей алмайды. Көмек пен қызметтер нақты бағытталуы тиіс. Басқарушылық шешімдер жүйенің тұрақтылығын қамтамасыз етіп, азаматтарға қызмет сапасының жақсаруына ықпал етуі тиіс”, — деді Балаева.

Бүгінде халық санының тұрақты өсуі мен көші-қон белсенділігі білім беру саласына да әсер етіп жатыр.

Оқу-ағарту министрі Жұлдыз Сүлейменованың айтуынша, елордада шамамен 200 орта білім беру ұйымы жұмыс істейді, онда 300 мыңнан астам оқушы бар. Жыл сайын оқушылар саны 10-12 мың балаға артып келеді. Педагогтерді даярлау сапасын арттыру, сонымен бірге мұғалімдерге түсетін артық әкімшілік жүктемені азайту да аса маңызды.

“Инфрақұрылым салып, заманауи техникамен жабдықтауға болады. Алайда сапа жоқ болса, нәтиже де болмайды. Бүгінгі балалар – ертеңгі қоғам. Президент көтерген бастамалар жауапты әрі белсенді азамат қалыптастыруға қызмет етуі қажет”, — деп атап көрсетті вице-премьер.

Астана ірі академиялық орталық мәртебесіне ие болғанымен, жоғары білім беру жүйесінде кадр даярлау бойынша құрылымдық мәселелер бар. Қаладағы 13 жоғары оқу орнында 105 мыңнан астам студент білім алады. Алайда гуманитарлық бағыттарда артықшылық болғанымен, инженерлік, IT, медицина және педагогика саласы бойынша тапшылық бар.

Ғылым және жоғары білім министрі Саясат Нұрбектің айтуынша, қабылдау жүйесін экономика сұранысымен тығыз байланыстыру, дуалды оқытуды дамыту және білім беру бағдарламаларын цифрландыру мен ЖИ-ді талаптарына сай жаңарту қажет.

Ал еңбек және халықты әлеуметтік қорғау министрі Светлана Жақыпова демографиялық өсімнің еңбек нарығы мен әлеуметтік қолдау жүйесіне әсер ететінін жеткізді. Ресми мәліметке сәйкес, елордадағы экономикалық белсенді халық саны 750 мыңнан асады. 2024-2025 жылдары қалаға 90 мыңнан астам адам келген, әлеуметтік қолдау алушылар саны 120 мыңға жуық. 2025 жылы 42 мыңнан астам адам жұмыспен қамтылды.

Премьер-министрдің орынбасары Аида Балаева жиынды қорытындылай келе, елорданың әлеуметтік дамуы демографиялық және көші-қон процестерін бағалауға негізделген кешенді шешімдерді қажет ететінін атап өтті.