Астанада Ғалым Қалиақбаровтың стендапы үзілді: не болды

Астанада полиция қызметкерлері танымал стендап-комик Ғалым Қалиакбаровтың өнерін үзіп тастады. Әлеуметтік желілерде оқиға орнынан түсірілген видео пайда болды, деп хабарлайды Tengrinews.kz тілшісі.

Кадрлардан полиция қызметкерлерінің кеш өтіп жатқан орында жүргенін көруге болады. Куәгерлердің айтуынша, комикті сахна сыртына алып кеткен.

Алдын ала мәлімет бойынша, шараның тоқтатылуына қажетті келісімнің жоқтығы себеп болған. Сонымен қатар, куәгерлердің айтуынша, оқиға орнында ешкім нақты жауап бермеген. Сондай-ақ айтылған наразылықтардың арасында сахнада бейәдеп сөздердің қолданылғаны да аталды.

Tengrinews.kz редакциясы пікір алу үшін Есіл ауданы әкімдігінің баспасөз қызметіне жүгінді.

Әкімдік ақпаратынша, 19 тамызда Carlin мекемесінде мәдени-бұқаралық шара өткен. Ведомствоның мәліметінше, ұйымдастырушылар шараны өткізу туралы міндетті хабарламаны 10 күн бұрын жібермеген, соған байланысты ол ресми түрде келісілмеген.

"Бұл процедура жай ғана ресмилік емес, азаматтардың қауіпсіздігінің негізгі шарты болып табылады. Хабарламаның уақтылы берілуі төтенше жағдай туындаған кезде келушілердің өмірі мен денсаулығын қорғау үшін шұғыл қызметтердің жұмысын жедел үйлестіруге мүмкіндік береді", - деп атап өтті әкімдік өкілдері.

Баспасөз қызметінің түсіндіруінше, уақтылы хабардар ету қажет болған жағдайда шұғыл қызметтердің жұмысын жедел үйлестіруге және төтенше жағдай кезінде келушілердің қауіпсіздігін қамтамасыз етуге септігін тигізеді.

Әкімдік өкілдері ұйымдастырушыларға заңнама талаптары мен қонақтардың қауіпсіздігін қамтамасыз ету тәртібін түсіндіру үшін оқиға орнына барған. Алайда, әкімдік ақпараты бойынша, ұйымдастырушылар қызметкерлердің мекеме аумағына кіруіне кедергі жасаған.

"Осыған байланысты ұйымдастырушылармен Есіл ауданының полиция басқармасында профилактикалық әңгіме жүргізілді. Онда оларға заң талаптары мен келісілмеген бұқаралық шараларды өткізу кезіндегі ықтимал қауіптер егжей-тегжейлі түсіндірілді", - делінген хабарламада.

Әңгімелесу аяқталғаннан кейін ұйымдастырушылар босатылды.

Google News арқылы жаңалықтарымызды қадағалаңыз