Астанада инфрақұрылымдық жобаларды аяқтау үшін мемлекеттік бағалы қағаздар шығарылмақ

— Энергетика және коммуналдық секторларды жаңғырту бойынша Ұлттық жобаны жүзеге асыру аясында мемлекеттік бағалы қағаздарды шығару арқылы 6 миллиард 197 миллион теңге көлемінде қосымша қаржы тарту жоспарланып отыр. Бұл қаржы жалпы құны 12 миллиард 330,6 миллион теңге болатын 7 жобаны іске асыруға бағытталады. Бюджеттік бағдарламаның әкімшісі — Энергетика басқармасы. Жобалар 19,6 шақырым жылу және электр желілерін тартуды көздейді, оның ішінде 2,9 шақырым жылумен жабдықтау желілері мен 16,7 шақырым электрмен жабдықтау желілері бар. Бұл жұмыстар Ш. Косшығұлұлы, Амман, Қ. Мұхамедханов, Ш. Айтматов көшелері, сондай-ақ Эллингтон және Агрогородок аудандарындағы тұрғындарға сапалы коммуналдық қызмет көрсету үшін жүргізіледі, — деді Айжан Түгелбаева қалалық мәслихат отырысында.

Оның айтуынша, уақытылы қаржыландыруды қамтамасыз ету 2026-2027 жылдары құрылыс жұмыстарын аяқтауға мүмкіндік береді. Осылайша, қазіргі жобаларды ескергенде мемлекеттік бағалы қағаздарды шығару бойынша қаражаттың жалпы көлемі — 28,7 миллиард теңге.

Сонымен бірге, спикер бірқатар іс-шараға арналған қаражатты қайта бөлу ұсынылғанын жеткізді.

Құрылыс басқармасына — 12 «жайлы мектепке» инженерлік желілер құрылысын аяқтауға 1 млрд 662 млн теңге бөлу жоспарланған. Білім басқармасына — Үркер тұрғын алабындағы 300 орындық балабақша ғимаратын сатып алуға бастапқы жарна ретінде 1 млрд теңге қарастырылған. Мәдениет басқармасына — ведомствоға бағынышты мемлекеттік мекемелер мен ұйымдардың негізгі шығындарына 500 миллион теңге бөлінеді.

Талқылау кезінде депутаттар қала бюджетіндегі ұсынылған түзетулерді қолдады.