Астанада көпір үстінде автобустар түйісті жолаушылар жаяу кетті

Астанада көпір үстінде екі автобус соқтығысты. Жол-көлік оқиғасы орнынан түсірілген видео әлеуметтік желілерде пайда болды, - деп хабарлайды Tengrinews.kz тілшісі.

Кадрлардан сол жағалаудағы көпірден түсер тұста бірнеше автобус тұрғанын көруге болады. Олардың айналасына адамдар жиналған, шамасы - жолаушылар.

Threads желісінен көру

Астана Полиция департаментінің баспасөз қызметі оқиғаның 10 қыркүйекте болғанын хабарлады.

"Yutong маркалы автобустың жүргізушісі Сарайшық көшесімен Қошқарбаев даңғылы жағынан келе жатып, "Арқар" көпірінен түсер тұста қауіпсіз арақашықтықты сақтамай, оң жақта қатарлас бағытта келе жатқан Iveco автобусымен соқтығысқан", - деп мәлімдеді полициядағылар.

Жол апаты салдарынан Iveco жолаушысы зардап шекті. Ол ауруханаға жатқызылған.

"Аталған факт бойынша тексеріс жүргізіліп жатыр, оның қорытындысы бойынша құқықтық баға беріледі", - деп толықтырды департамент өкілдері.

Еске салайық, жақында Қарағанды түбінде жолаушылар мінген автобус трассадан шығып кеткен еді.

Бізді Google-дың негізгі дереккөздер тізіміне қосыңыз