​Астанада лифт шахтаға құлады: бір адам мерт болып, екеуі ауруханада жатыр

Астанадағы тұрғын үй кешендерінің бірінде лифт шахтасына құлап, бір адам қаза тапты. Тағы екі адам жарақат алды, деп хабарлайды Tengrinews.kz.

Төтенше жағдай Төлебаев көшесі, 5 мекенжайындағы "Арыстан" тұрғын үй кешенінде болған. Әлеуметтік желілерде оқиға орнынан түсірілген бейнежазбалар тарап, тұрғындар болған жайтқа наразы пікір білдірген.

Қалалық денсаулық сақтау басқармасының хабарлауынша, оқыс жағдай жөндеу жұмыстары кезінде болған.

“Лифтке қызмет көрсететін компанияның бір қызметкері оқиға орнында көз жұмды. Екі адам №1 көпсалалы қалалық ауруханаға жеткізілді. Бірінің жағдайы ауыр, екіншісінікі – орташа ауыр деңгейде. Бірі жансақтау бөлімінде, екіншісі жарақат бөлімінде ем қабылдап жатыр. Оларға барлық қажетті медициналық көмек көрсетілуде”, – делінген басқарма таратқан ақпаратта.

Астана қалалық полиция департаменті аталған факті бойынша “Еңбек қауіпсіздігі ережелерін бұзу, адам өліміне әкеп соқтыру” бабымен қылмыстық іс тіркелгенін мәлімдеді.

Қазір тергеу амалдары жүргізіліп, тиісті сараптамалар тағайындалды.

Бүгін, 18:17