Астанада полицейлерден қашқан жігіттің көлігінен есірткі табылды

АСТАНА, 7 сәуір – Sputnik. Астанада полицейлерден қашқан 25 жастағы ер адамның көлігінен есірткі табылды, деп хабарлайды Sputnik Қазақстан.

Қалалық полицияның мәліметінше жедел іздестіру іс-шаралары барысында полицейлер "Chery" маркалы автокөлікті тоқтатпақ болған. Алайда жүргізуші заңды талапқа бағынбай, жасырынуға әрекет жасаған.

"Қуғын барысында ол тұрғын үй ауласына кіріп, екі тұрақта тұрған автокөлікпен соқтығысқан. Одан кейін ер адам көлікті тастап, жаяу қашпақ болғанымен, полиция қызметкерлері оны ұстады", - деп жазылған хабарламада.

Көлікті тексеру барысында артқы орындығынан жасыл түсті оқшаулағыш таспамен оралған, ұнтақ тәрізді зат салынған орама табылды. Сараптама қорытындысына сәйкес, бұл зат — жалпы салмағы шамамен 500 грамм болатын "Альфа-PVP" есірткі заты екені анықталды.

Аталған дерек бойынша есірткі заттарын тарату фактісі бойынша қылмыстық іс қозғалды. Күдікті уақытша ұстау изоляторына қамалды.