Астанада қазақстандық суретші әйелдердің көрмесі ашылды

Астанада қазақстандық суретші әйелдердің көрмесі ашылды. Онда отандық және халықаралық өнер кеңістігінде есімі көпке танымал қылқалам шеберлерінің жұмыстары қойылды. 

Олардың қатарында – Алтыншаш Алпысбаева, Рахат Сапарәлиева, Ильсуар Казакова, Рашита Мусагаева, Динара Нугер сияқты белгілі суретшілер бар.  Әйел жан дүниесінің нәзік қырларын ашатын сурет туындылары қалың көпшіліктің ықыласына бөленді. Көрме «Сенім» деген атаумен өтуде. 

Өнер жолындағы қыз-келіншектердің шығармашылығын кеңінен насихаттауға бағытталған шарада 150-ден астам туынды келушілер назарына ұсынылды. Ұлттық  киімдегі әйел бейнелері, ана махаббаты мен ана бақыты тақырыптарын арқау еткен жұмыстар көрермен тарапынан ерекше бағаға ие болды. Көрме үш ай бойы жалғасады.

Естай Даубаев, Қазақстан суретшілер одағының мүшесі:

- Мен керемет әсер алдым. Өйткені бұл ұлттық музей шаңырағында болып жатқан көрме. Жәй ғана көрме емес қыздар ұйымының көрмесі. Мықты қыз-келіншектерден жиналған талантты суретшілер. Оның ішінде Жәмилә бастаған. Әрине осы алғаш 25 жыл бұрын алғаш бастаған ешкім сенбеп еді қыздар не істеуі мүмкін деген сияқты бүгінгі күні нәтижесін көріп тұрмыз. Бұл қыздардың бойындағы күштің, ол жәй ғана қыз-келіншек емес олар айтадығой «қазақ қыздың қырық жаны бар» деп сонымен қатар осындай талант бар өнер бар.