Астанада шетелден көлік әкелеміз деген алаяқтар жазаланды

Астанада екі азамат интернет арқылы көлік сатамыз деп алаяқтық жасағаны үшін сотталды.

Прокуратураның мәліметі бойынша, өздерін шетелден автокөлік тасымалдаушы делдал ретінде таныстырған алаяқ екі азамат жәбірленушінің ірі көлемде қаржысын жымқырып алды. Алаяқтық схема бойынша, қылмыскерлер көлік сатып алу және оны жеткізу шығындары үшін жәбірленушіден алдын ала 16 млн теңге аударуды сұраған.

Алаяқтар жәбірленушімен байланысты тек мессенджерлер арқылы жүргізген. Сенімге кіру үшін олар ойдан шығарылған мәліметтерді пайдаланып, хабарламаларды кәсіби делдалдарша алмасып отырған. Нәтижесінде жәбірленуші уәде етілген автокөлікті де көре алмай, қомақты қаржысынан да айырылып қалды.

Сот кінәлі тұлғалардың әрекетін толық дәлелдеп, оларға қатаң жаза тағайындады: бір айыпталушы 5 жылға, екіншісі 6 жыл 8 айға бас бостандығынан айырылды.

Сондай-ақ, жәбірленушінің залалды өндіру туралы азаматтық талап арызы толық қанағаттандырылды.

Астана прокуратурасы алаяқтық үшін мүлікті тәркілеумен қатар, 10 жылға дейін бас бостандығынан айыру жазасы қарастырылғанын қаперге береді. Азаматтарды күмәнді онлайн-мәмілелерден сақ болуға және ақша аударуда аса мұқият болуға шақырады.

Бүгін, 17:32