Астанада Ұлттық ұлан ардагерлері үшін шаңғы теуіп, таза ауада бас қосты

Елордада Ұлттық ұлан ардагерлері үшін шаңғы тебуден арнайы спорттық шара ұйымдастырылды, – деп хабарлайды Aikyn.kz сайты.

Іс-шара жалпыұлттық референдум қарсаңында өтіп, қатысушыларға көтеріңкі көңіл-күй сыйлады.

Қысқы серуен қаладағы орталық саябақта өтті. Оған әр жылдары әскери қызмет атқарған ардагерлер жиналды. Қатысушылардың басым бөлігі – жасы алпыстан асқан тәжірибелі жандар. Соған қарамастан, олар белсенді өмір салтын ұстанып, жастарға үлгі көрсетіп отыр.

Шара барысында ардагерлер шаңғы тебумен қатар, бір-бірімен емен-жарқын әңгімелесіп, қызметтегі естеліктерімен бөлісті. Еркін форматтағы бұл кездесу олардың басын қосып, бұрынғы достық байланысты нығайтты.

Іс-шара соңында ардагерлерді Ардагерлер кеңесінің төрағасы, запастағы полковник Григорий Пригожин сөз сөйлеп, оларға зор денсаулық пен сергектік тіледі. Сонымен қатар, мұндай спорттық шаралар жастарды салауатты өмір салтына баулитынына сенім білдірді.

Ардагерлер кеңесінің өткен жылғы жұмысының қорытындысын шығара отырып, Григорий Александрович үздік мүшелерді атап өтті және алдағы жылға арналған жоспарларымен бөлісті.

Айта кетсек, биылғы ардагерлер ұйымдастыратын іс-шаралар Қазақстан Республикасының Тәуелсіздігінің 35 жылдығына арналады.