Астанада журналистер арасындағы дәстүрлі бильярд турнирі өтті

Elorda Aqparat медиахолдингінің ұйымдастыруымен Республика күніне, сондай-ақ «Астана ақшамы» және «Вечерняя Астана» газеттерінің 35 жылдық мерейтойына орай журналистер арасындағы дәстүрлі бильярд турнирі өтті, – деп хабарлайды Aikyn.kz

Биыл төртінші рет ұйымдастырылған додаға елордадағы қаламгерлер, журналистер, қоғам қайраткерлері мен зиялы қауым өкілдері қатысты.

Іс-шараның ашылуында Астана қалалық қоғамдық кеңесінің төрағасы Зұлфухар Ғайыпов сөз сөйлеп, егемендіктің бастауы саналатын Республика күні мерекесінің тарихи мәні мен маңызына тоқталып, жиналғандарды Республика күнімен құттықтады.

«Бүгінгі жетістігіміздің бәрі – бейбіт заманның, тоқшылық дәуірдің, егемен ел болғанымыздың арқасы. Бас қаламыздың тарихын ғана емес, тәуелсіз Қазақстанның әрбір тарихи күнінің куәгері қос басылымның мерейтойы құтты болсын», - деді ол.

Сондай-ақ ҚР Парламенті Сенатының депутаты Алтынбек Нұхұлы қатысушыларды мерекемен және қос басылымның 35 жылдық мерейтойымен құттықтап, Elorda Aqparat медиахолдингі директоры Олжас Сыдықбек пен «Астана ақшамы» газетінің бас редакторы Еркін Қыдырға шапан жауып, Академик Қаныш Сәтбаевтың 5 томдық еңбегін сыйға тартты.

Жарыстың ашылу салтанатында қазақ әдебиетінің көрнекті өкілдері, жазушы Төлен Әбдік пен Қойшығара Салғара сөз сөйлеп, қатысушыларға батасын беріп, сәттілік тіледі.

«Астана ақшамы» газетінің бұрынғы редакторларына және келген қонақтарға сөз беріліп, жылы естеліктер мен ізгі тілектер айтылды.

Қаламгерлер арасындағы ойын өте тартысты өтті. Тастаяқ шеберлерінің бірі сақаны көздесе, енді бірі шарды дәл ұпай ұясына бағыттап, сайыстың көрігін қыздырды.

Сөйтіп, ойын нәтижесінде үшінші орынды Талғат Ешенұлы мен Сәдібек Түгелұлы, екінші орынды Қайрат Сақ, ал бірінші орынды Наурызбек Сарша жеңіп алды.

Бұдан бөлек, «Алғашқы соққы», «Мәдениетті ойыншы», «Мерген ойыншы», «Шебер ойыншы» секілді арнайы аталымдар да табысталды.

Elorda Aqparat медиахолдингінің директоры Олжас Сыдықбек көрнекті жазушы Төлен Әбдікке Міржақып Дулатов атындағы, ал Қойшығара Салғараға Ілияс Есенберлин атындағы арнаулы сыйлықты тапсырды.

Сараптама, зерттеу мақала, күнделікті өзекті ақпаратты «Айқынның»  TELEGRAM  арнасынан табасыз