​Астанадағы 149 жедел жәрдем көлігінің 32 сі ғана жарамды: үкім шықты

Астана қаласы жедел медициналық жәрдем станциясының бұрынғы басшылары санитарлық автокөліктерді жөндеуге және техникалық қызмет көрсетуге бөлінген 700 млн теңгеден астам қаражатты жымқырғаны үшін сегіз және тоғыз жылға бас бостандығынан айырылды.

Қылмыстық схема жұмыс істеген уақыт ішінде жарамды көліктер саны 149-дан 32-ге дейін азайып кеткен.

Елорда прокуратурасының хабарлауынша, жымқыру деректері 2020 жылдан 2023 жылға дейін болған. Схеманы станцияның бұрынғы директоры, көлік бөлімінің экс-басшысы және қойма меңгерушісінің міндетін қоса атқарған бұрынғы бас механик ұйымдастырған.

Сот үкімі бойынша сотталғандардан 440 млн теңгеден астам қаражат өндіріп алынды. Жарамды автокөліктердің жетіспеушілігі салдарынан такси қызметіне жұмсалған тағы 300 млн теңгеден астам қаражатты азаматтық сот өндірісі шеңберінде өндіріп алу жоспарланып отыр.

Үшеуі де Қазақстан Қылмыстық кодексінің 189-бабы 4-бөлігінің 2-тармағы бойынша айыпты деп танылды. Оларға сегіз және тоғыз жыл мерзімге нақты бостандығынан айыру жазасы тағайындалды.

Бұдан бөлек, сотталғандарға мемлекеттік қызметте және квазимемлекеттік сектор ұйымдарында қызмет атқаруға өмір бойына тыйым салынды.

Бүгін, 10:28