Астанадағы дәмханаларға ит еті жеткізіліп жатыр ветеринарлық қызмет мәлімдеме жасады

АСТАНА, 21 мамыр – Sputnik. "Астана Ветсервис" кәсіпорны елордадағы қоғамдық тамақтану орындарына ит етінің жеткізіліп жатқаны туралы ақпаратқа қатысты ресми мәлімдеме жасады.

"Хабарланған мәліметтер 2023 жылы Ақмола облысы аумағында жануар тектес өнімдердің заңсыз айналымы анықталған оқиғаға қатысты екенін мәлімдейміз. Аталған факті бойынша құқық қорғау органдары заңнамаға сәйкес тергеу жүргізген", - деп жазылған хабарламада.

Іс материалдары сотта қаралып, кінәлі тұлға қолданыстағы заңнамасына сәйкес жауапкершілікке тартылған.

Ветеринарлық қызмет қазіргі уақытта Астана қаласындағы қоғамдық тамақтану орындарында мұндай өнімді жеткізу, сату немесе пайдалану фактілері ресми түрде расталмағанын алға тартты.

"Елордада жануар тектес өнімдерге тұрақты түрде ветеринариялық-санитариялық бақылау жүргізіледі. Оның аясында ілеспе құжаттар тексеріліп, жеткізушілерге мониторинг жасалады және азық-түлік қауіпсіздігі талаптарының сақталуы қадағаланады", - деп жазылған Астана әкімдігіне қарасты кәсіпорын хабарламасында.

Бүгінде ет өнімдерінің заңсыз айналымына немесе Астана қаласындағы қоғамдық тамақтану орындарының қызметіне қатысты заңбұзушылықтарға байланысты деректер анықталмаған.

Жағдай уәкілетті органдардың тұрақты бақылауында. Азаматтарды тек ресми ақпаратқа сенуге және расталмаған мәліметтерді таратпауға шақырамыз, дейді мекемеде.