​Астрахандағы газ өңдеу зауытының аумағында дрон қалдықтары өртке себеп болды

Астрахан облысы мен Башқұртстанда өндірістік нысандарға дрондармен шабуыл жасалды, деп жазады Нефть и Капитал телеграм-каналы.

Астрахандағы газ өңдеу зауытында дрондардың қалдықтары аумаққа құлап, өрт шықты. Аймақ басшысы Игорь Бабушкин барлық дрондар атып түсірілгенін немесе басылғанын айтты, алайда құлаған бөлшектер өртке себеп болған. 

Қаза тапқандар мен зардап шеккендер жоқ, төтенше жағдай қызметкерлері өртті сөндіруде, ауаға зиянды заттардың таралу қаупі жоқ деп хабарланды.

Башқұртстанда «Транснефть» компаниясына қарасты «Нурлино» станциясы шабуылға ұшырап, мұнай резервуары маңында өрт шықты. Екі қызметкер ауыр күйік алып, ауруханаға жеткізілді.

Астрахан газ өңдеу зауыты – әлемдегі ең ірі газхимиялық кешендердің бірі, оңтүстік Ресейге отын жеткізетін негізгі кәсіпорын. Ал «Нурлино» станциясы – Urals мұнай сорты қалыптасатын стратегиялық транзиттік торап, ол арқылы мұнай «Дружба» жүйесіне және Балтық порттарына бағытталады.

Бүгін, 17:58