Атырау әкімдігі апатты 14 үйдің мәселесін шешу үшін демеуші іздеп жатыр

Себебі, бұл баспаналарды салған «АзияСтройСервис» компаниясы банкрот болған. Компания өкілдері және тұрғындардың қатысуымен жиналыс өткен.

Атырау қаласының әкімі Шәкір Кейкиннің айтуынша, мердігер мекеме өкілі бұл мәселенің сот арқылы шешілетінін айтып, өтемақы төленбейтінін мәлімдеген.

- Мердігер мекеме «сот қорытындысына сәйкес маған қандай шара қолданылады, мен оған дайынмын» деді. 14 үйдің тұрғындарын далаға тастамаймыз. Уәде бердік. Демеуші іздеп, өтемақы төлеу мәселесін қарастырып жатырмыз. Біздің жауабымызға қағанаттанбай отырған кей тұрғындарға сотқа жүгінуге ұсыныс бердік, - деп пікір білдірді Атырау қаласының әкімі Шәкір Кейкин.

Шәкір Кейкиннің сөзінше, 244 млн теңгеге осы үйлердің құрылыс жұмыстары жүргізілген.

Естеріңізге сала кетейік, 2020 жылы «Нұрлы Жер» бағдарламасы арқылы «Талқайраң-2» ықшам ауданына 60 үй салынып, тұрғындарға берілген. Оның 12-сі – екіқабатты. Ал 28 үй бірқабатты. Қалған 20 баспана екі пәтерден тұрады. Бұл үйлерді 3 мердігер салған. Азаматтар «Отбасы банктен» ипотекаға алған. Алайда аз уақыт өткеннен кейін қабырғалары жарылып, еден түсіп кеткен. Тіпті жарлары құлап, адам өміріне қауіп төндірген. Сондықтан көпшілік пәтер жалдап жүруге мәжбүр.

2025 жылдың күзінде осы ықшам ауданда салынған тұрғын үйлердің сапасына қатысты тұрғындар тарапынан келіп түскен арыз-шағымға байланысты қылмыстық іс қозғалды.

Биыл 5 ақпанда мемлекеттік ғылыми-зерттеу және жобалау институтының қорытындысы шықты. Мамандар үйлердің сапасы сын көтермейтінін мәлімдеген. Жөндеуге келгенмен, оның шығыны жаңа үйдің құрылысына керекті қаржымен бірдей болады. 54 үйді салған «БатысАльянсСтрой» ЖШС 60 және 120 шаршы метрлі баспаналарға 18 және 30 млн теңге көлемінде өтемақы төлеуге дайын екендерін айтқан еді.

Осыған дейін Атырауда 7 жыл бұрын басталған 24 тұрғын үй жобасы әлі аяқталмағанын жазған едік.