Аягөзде әлеуметтік үйлерді жекешелендіру мәселесін шешу үшін жұмыс тобы құрылды

Аталған мәселе бойынша облыс әкімі Берік Уәлидің тапсырмасымен облыстық жұмыс тобы құрылды. Бүгін жұмыс тобының мүшелері аудан тұрғындарымен кездесіп, заң аясында атқарылатын шараларды егжей-тегжейлі түсіндірді.

Фото: Абай облысының әкімдігі

Абай облысы прокуратурасының қоғамдық мүдделерді қорғау басқармасының бастығы Мейіржан Қалиасқаровтың айтуынша, мәселе жер учаскелерінің құқықтық рәсімделмеуінен туындаған.

– Ең бірінші Жер кодексінің талаптарына сәйкес, жерге деген меншік құқығы және үйге деген меншік құқығы бір-бірінен ажыратылмайды. Ал берілген үйлердің жеріне қатысты кадастрлық төлемдер мемлекетке төленбеген. Бұл тұрғындардың емес, үйлерді салған және сатқан кәсіпкерлердің тарапынан кеткен заң бұзушылықтар, - деді Мейіржан Қалиасқаров.

Фото: Абай облысының әкімдігі

Оның айтуынша, ендігі кезекте кәсіпкерлер мен аудандық әкімдік бірлесе отырып, ортақ шешім қабылдауы тиіс. Әрбір жер учаскесі бойынша кадастрлық төлем көлемі 300 мыңнан 700 мың теңгеге дейін.

– Егер кәсіпкерлер өз еріктерімен төлем жасамаса, уәкілетті органдар сотқа жүгініп, төлемді мәжбүрлеп өндіріп алу шарасын қолданады. Бірақ тұрғындар алаңдамасын – ешкімді үйінен қуып шығармайды. Тек жекешелендіру рәсімі 1-2 айдың ішінде шешімін табады, - деп нақтылады Мейіржан Қалиасқаров.

Фото: Абай облысының әкімдігі

Аягөз қаласының тұрғыны, көпбалалы ана Күмісхан Қыдырмолдина билік өкілдерінен бұл мәселенің тезірек шешілуін сұрады.

– Мен жаңа жиналысқа қатыстым. Прокуратура, аудан әкімдігі, облыс әкімінің орынбасары болды. Біздің аналардың бар тілегі – үйлерді жекешелендіріп, жер мәселесін заңды түрде шешіп беру. Қараша айына дейін шешіледі деді, соны күтеміз, - деді ол.

Фото: Абай облысының әкімдігі

Облыс әкімі Берік Уәли бұл мәселені қараша айының соңына дейін толық шешуді тапсырды.

Жұмыс тобы осы уақыт ішінде тұрғындардың өтініштері мен құжаттық рәсімдерін заң шеңберінде реттейтін болады.