Атырау облысында Заң мен тәртіп идеологиясын насихаттау үшін арнайы жұмыс тобы құрылды

Мемлекет басшысы жариялаған «Заң мен тәртіп» идеялогиясын кеңінен насихаттау мақсатында Атырау облыстық прокуратурасының бастамасымен арнайы ведомстволық жұмыс тобы құрылды.

Аталған топ өңірдің барлық аудандарын аралап, тұрғындармен кездесу өткізуді жоспарлаған. Кеше осындай кездесу шалғайдағы Қызылқоға ауданында ұйымдастырылды. Кездесуге облыстағы мемлекеттік мекемелер мен құқық қорғау органдарының өкілдері қатысып, тұрғындардың сан-салалы өтініштері мен ұсыныстарын тыңдады. Әрбір мәселе бойынша тиісті түсініктемелер беріліп, шешу жолдары қарастырылды.

Атырау облысында «Заң мен тәртіп» идеологиясын насихаттау үшін арнайы жұмыс тобы құрылды

Кездесуге тұрғындар тиянақты дайындалып, нақты ұсыныстарымен келген. Бір назар аударарлығы олар жеке басының емес, ауданға қатысты өзекті мәселелерді қозғады.

Айжан Ізімова, ауыл тұрғыны:

- 2023 жылы басталған жолдардың күні бүгінге дейін белгісіз себептермен аяқталмай тұрғаны. Осыған тиісті органдар арқылы мәселе көтеріп, осыны шешіп берсе, халықтың тілегі осы.

Тұрғындар тілегін тыңдаған облыс прокуроры Мадияр Басшыбаев ауданда қордаланған мәселелерді шешуді жауаптыларға тапсырды. Сол жерде мемлекеттік орган өкілдері азаматтарды қабылдап, кеңес берді. Кейбір түйінді түйткілдер қадағалаушы органның бақылауына алынатын болды.

Әділет Нұрбайұлы, облыстық прокуратураның аппарат басшысы:

- Бұл кездесудің өзіндік ерекшелігі бар. Бізге жүгінген әр тұрғынның мәселесі бойынша тізім жасалып, «Жол картасы» әзірленетін болады. Және оған енгізілген мәселелер өз шешімін тапқанша облыс прокруорының және облыс әкімінің бақылауында тұрады. 

Ербол Жұмабай, облыс әкімі аппараты басшысының орынбасары:

- Жұмысшы тобының құрамында құқық қорғау органдарының өкілдері, жергілікті атқарушы органдардың басшылары және орталық мемлекеттік органдардың аумақтық бөлімшелерінің жетекшілері қатысты. Қазіргі таңда осы жұмыс тобымен ауыл, аудан тұрғындарына құқықтық және ақпараттық түсіндіру жұмыстары жүргізіліп жатыр.

Мұндай кездесулер облыстың 7 ауданында және Құлсары қаласында да ұйымдастырылады.

Арыстанбек Кенже, Айбек Байзақов, Жандос Рахметуллин