Атырау әуежайында жолаушылар рейстердің кешігуі мен тоқтатылуына шағымдануда

14 қаңтардан бері Атырау халықаралық әуежайында жолаушылар рейстердің кешігуі мен толықтай тоқтатылуына шағымдануда. Олардың айтуынша, ұшулар белгісіз уақытқа кейінге қалдырылып, авиакомпаниялар мен әуежай тарапынан нақты түсініктеме немесе көмек көрсетілмей отыр.

Атырау тұрғыны редакцияға екі күннен бері Астанадан үйіне қайта алмай отырғанын жеткізді. Оның билеті Air Astana компаниясынан сатып алынған екен.

- Кеше біздің рейске тағы екі рейс қосылып, бәрі тоқтатылды. Себебін нақты түсіндірмейді: боран дейді, бірақ Астанадан басқа қалаларға ұшақтар қатынап жатыр. Қонақүйді тек бір тәулікке берді, ары қарай өз есебімізден төлеуіміз немесе билетті қайтаруымыз керек, – деді ол.

Оның айтуынша, олар амалсыздан Ақтау, Ақтөбе арқылы немесе пойызбен. балама бағыттарды өздері табуға мәжбүр.

- Қазір әуежайда негізінен тек билет қайтаруды ұсынып жатыр. Біздің тұратын жеріміз бар, ал баспанасы жоқ адамдар не істейді – белгісіз, – дейді жолаушы.

Ұқсас жағдайды Scat компаниясының жолаушылары да бастан кешірген. Олардың рейсі бірнеше рет кейінге қалдырылып, ақырында мүлде тоқтатылған.

- Осы кешігулердің кесірінен біз енді Астанадағы пойызға үлгермейміз. Ешқандай балама ұсынылған жоқ, – деп жазды бір жолаушы.

Кешігулер ішкі рейстерге де әсер етті. 

- 14 қаңтардан бері Теңіз кенішіне ұшулар тоқтатылды. Екі күнде бар болғаны екі ұшақ қана ұшты, – деді тағы бір қала тұрғыны.

Хиуаз Доспанова атындағы халықаралық әуежайда рейстерді қабылдау және жіберу ауа райының қолайсыздығына байланысты уақытша тоқтатылғаны хабарланды. Әуежайдың баспасөз қызметі хабарлағандай, соңғы рейс бүгін таңғы сағат 04:00 шамасында ұшып шыққан.

Әуежайдың баспасөз қызметі рейстердің қабылдануы мен жіберілуі ауа райының қолайсыздығына байланысты уақытша  Соңғы рейс бүгін таңғы 04:00-де ұшып шыққан.

Бұған дейін Air Astana ұшу-қону жолағының үйкеліс коэффициентінің төмендігіне байланысты 15 қаңтарда кешкі рейстердің кейінге қалдырылғанын хабарлаған болатын. Кешіктірілген рейстердің қатарында КС 983/984 Астана – Атырау – Астана, КС 885 Алматы – Атырау, КС 878 Атырау – Алматы бағыттары бар. Ал КС 904 Амстердам – Атырау рейсі Ақтауға бағытталды.

Жолаушыларға рейстердің мәртебесін авиакомпаниялардың сайттары мен мобильді қосымшаларынан бақылау ұсынылды.

Еске сала кетейік, 14 қаңтарда FlyArystan әуе компаниясының ұшағы Атырау әуежайына қонғаннан кейін жүру  жолынан шығып кеткен болатын.

Айнұр САПАРОВА

Бүгін, 14:25