​Атырау облысында әйел полицейлердің қызметіне кедергі жасады

Атырау облысында 18 жастағы тұрғын полициядан қашпақ болғаны үшін 10 тәулікке қамауға алынды. 

Оқиға 28 наурызда Исатай ауданында орын алған.

Құқық қорғау органдарының мәліметінше, Lada Priora автокөлігін тізгіндеген жас жігіт полиция қызметкерлерінің тоқтау туралы заңды талабына бағынбай, жасырынуға тырысқан. Нәтижесінде ол ұсталды.

Тексеру барысында жүргізушінің куәлігі жоқ екені анықталды. Ол бірден бірнеше бап бойынша — көлікті басқару құқығынсыз жүргізгені және полицияның заңды қызметіне кедергі келтіргені үшін әкімшілік жауапкершілікке тартылды. Сот шешімімен құқық бұзушыға 10 тәулік мерзімге әкімшілік қамауға алу жазасы тағайындалды.

Сонымен қатар, полиция қызметкерлерінің әрекетіне кедергі келтірген 57 жастағы әйел де жауапқа тартылды. Бейнежазбада оның полиция автокөлігінің алдында қақпаны жауып тастағаны анық көрінеді. Сондай-ақ, көлікті құқығы жоқ адамға бергені үшін машина иесі де жазаланды.

Жас жігіттің білім алып жатқан оқу орнына профилактикалық шаралар қабылдау үшін арнайы ұсыныс жолданды.

Полиция бұл жағдай заңды бұзу және ішкі істер органдары қызметкерлерінің талаптарын елемеу үшін жазаның бұлтартпастығы принципін көрсететінін атап өтті.

Бүгін, 17:52