Атырау облысында газ химия өндірістеріне арналған құбырлар салынады

АСТАНА, 23 желтоқсан - Sputnik. Атырау облысында этан мен пропанды теңізден газ химиясы кәсіпорындарына тасымалдауға арналған магистральдық құбырлар салынады, деп хабарлады "ҚазМұнайГаз"ұлттық компаниясы.

"Қазмұнайгаздың" еншілес компаниясы - KMG PetroChem - China Petroleum Pipeline Engineering Co бастаған консорциуммен EPC-келісімшартқа қол қойды.

Тараптар жобалық құжаттаманы әзірлеуге, жабдық сатып алуға, сондай-ақ құрылыс, іске қосу-жөндеу жұмыстарын жүргізуге және пайдалануға уағдаласты.

"Жобаны іске асыру бірыңғай технологиялық тізбекті қалыптастырады және этан мен пропан фракцияларының сұйытылған күйде сенімді, қауіпсіз және үздіксіз тасымалдануын қамтамасыз етеді", - делінген хабарламада.

Болашақ құбыр арқылы шикізат "Теңізшевройлдан" және теңізде салынып жатқан газ-сепарациялық кешеннен бұдан әрі өнім полиэтилен мен полипропилен шығаратын газ-химия кәсіпорындарына жеткізілетін болады.

"Магистральдық құбырлар болашақ өндірістердің тұрақтылығын қамтамасыз ететін технологиялық циклдің негізгі элементі болады", - дейді ұлттық компания.

"Қазмұнайгаз" бұл құбырлар Қазақстан үшін бірегей жоба деп есептейді: алғаш рет этан мен пропан құбыры әрқайсысының ұзындығы 210 км бірыңғай техникалық дәлізде салынатын болады.

Құрылыс-монтаждау жұмыстарын 2026 жылдың IV тоқсанында бастап, 2028 жылдың соңына қарай пайдалануға беру жоспарланған.