Атырау облысында полиэтилен зауытына азот жеткізуге арналған қондырғылар салынады

«Силлено» мен «Эр Ликид Карабатан Тех Газы» компаниялары техникалық газдарды жеткізу бойынша ұзақ мерзімді келісімге қол қойды. 

Бұл келісім Қазақстан Президенті Қасым-Жомарт Тоқаевтың Бельгияға ресми сапары барысында жасалды.

Жоба аясында екі заманауи энергия үнемдейтін ауа бөлу қондырғысы салынып, жоғары тазалықтағы азот өндірілмек. Инвестиция көлемі — 70 млн еуро. Қондырғылар арнайы экономикалық аймақ «Ұлттық индустриялық мұнайхимия технопаркі» аумағында, болашақ полиэтилен зауытының жанында орналастырылады.

Техникалық газдарды жеткізу 2028 жылдың соңына жоспарланған. Азот пен сығылған ауа өндірістік процестерде, реттеу жүйелерінде, өлшеу құралдарында және автоматикада кеңінен қолданылады.

Жоба Қазақстанның мұнайхимия саласын дамытуға және жоғары қосылған құнды өнім шығаруға бағытталған.

24 маусым, 17:46