Атырау жылу электр орталығы сөндірілген әкті тал егуге дайындаған ба?

Әлеуметтік желіде жылу электр орталығы аумағындағы ақ түсті үйінділердің видеосы жарияланғаннан кейін кәсіпорынға шамамен 8 млн теңге айыппұл салынды. 

Алайда орталық басшылығы бұл материалды заңсыз қалдық емес, әк шөгіндісі деп түсіндіріп отыр. Олардың айтуынша, әк шөгіндісі санитарлық-қорғау аймағындағы сортаң топырақты бейтараптандыруға және болашақта ағаш отырғызуға дайындық жұмыстарына пайдаланылуда.

Атырау тұрғыны Ерлан Абиров әлеуметтік желіде Атырау жылу электр орталығы (АЖЭО) аумағына сөндірілген әк төгіліп жатқанын көрсеткен видео жариялаған. Жазбасында ол бұл әрекетті заңсыз қалдық төгу деп бағалаған. Осыдан кейін Ерлан Абиров табиғат қорғау прокуратурасына, сондай-ақ экология департаменті мен қалалық санитариялық-эпидемиологиялық қызметке (СЭС) арыз түсірген.

«Ақ Жайық» редакциясы әлеуметтік желіде видео жарияланғаннан кейін табиғат қорғау және санитарлық органдарға, сондай-ақ Атырау жылу электр орталығына ресми сауал жолдады. Тексерулердің нәтижесінде кәсіпорынға айыппұл салынып, төгілген аумақты тазарту туралы нұсқама берілді. Ал орталық басшылығы өздеріне тағылған айыптарды жоққа шығарды.

Кәсіпорын мәліметінше, бұл видеода жылу электр орталығының өндірістік алаңы, яғни су тұндырғыштары мен технологиялық шөгіндіні уақытша сақтау учаскесі көрсетілген. Учаске аумағы — 7,1705 гектар. Бұл жер телімі су тұндырғышын орналастыруға арналған делінеді. Кәсіпорынға бұл жер телімі 2021 жылы қала әкімдігі қаулысымен су тұндырғышын салу және пайдалану үшін жалға берілген. 2028 жылдың 6 наурызына дейін пайдалану құқығына ие. Су тұндырғышы құрылысы 2024 жылдың 2 ақпанында аяқталған соң пайдалануға берілген.

Сондай-ақ кәсіпорын жауабында су тұндырғышының негізгі мақсатына тоқталған. Онда су тұндырғышының станцияның технологиялық процестеріне пайдаланылатын суды қосымша тұндырып, тазарту арқылы әк шөгіндісін тиімді бөлу үшін қажеттігі айтылған. Одан бөлек, әк шөгіндісі тұндырылған соң жылу электр орталығының өндірістік аумағындағы химиялық су тазарту тұндырғыштарының маңында уақытша сақталып, оның қоршаған ортаға қаупі жоқтығы да келтірілген. Шөгінді қалдықтарды шығару және кәдеге жарату (қайта өңдеумен) «ЭКО ПромKZ» ЖШС айналысады.

Кәсіпорын мәліметінше, түзілген әктің бір бөлігі өзінің шаруашылық қызметінде санитарлық-қорғау аймағындағы сортаң жерлерді бейтараптандыру үшін пайдаланылады.

«Бұл жұмыстар топырақтың физикалық-химиялық қасиеттерін жақсартуға және кейіннен жасыл желек отырғызуға арналған аумақты дайындауға бағытталған», - деп хабарлады ЖЭО.

Оған қоса, сөндірілген әкке қатысты қалдық паспорты және 2034 жылға дейін қалдықтарды басқару бағдарламасы әзірленіп, іске асырылып жатыр деп мәлімдеген.

Алайда тексерулердің қорытындысы бойынша кәсіпорынға әкімшілік шаралар қолданылды.

Атырау қалалық санитарлық-эпидемиологиялық бақылау басқармасы Әкімшілік құқықбұзушылық туралы кодекстің 425-бабы бойынша Атырау жылу электр орталығына санитарлық-қорғау аймағы жобасының болмауына байланысты 1600 АЕК көлемінде айыппұл салған. Бұл — 6 млн 920 мың теңге.

Ал Атырау облыстық экология департаменті кәсіпорынды «қалдықтарды басқару жөніндегі экологиялық талаптарды бұзу» бойынша (Әкімшілік құқықбұзушылық туралы кодекстің 344-бабы) әкімшілік жауапкершілікке тартқан. Осы бап талабы бұзылғаны туралы хаттамамен келіскеніне байланысты қысқартылған тәртіппен 1 млн 81 мың 250 теңге айыппұл салынған.

Сонымен қатар, төгілген аумақты тазарту туралы нұсқама берілген. Экология департаменті баспасөз қызметі бұл ақпаратты растап, нұсқама талабы бүгінгі күні орындалғанын хабарлады.

Бұған дейін нұсқаманың қалай орындалып жатқанын көру үшін аталған жерге қайта барған қала тұрғыны Ерлан Абиров қалдықтардың үсті топырақпен көмілеп жатқанын байқаған. Осы жөнінде ол әлеуметтік желіде тағы жазба жариялаған.

Кәсіпорын бұл жолы да түсініктеме беріп, төгілген сөндірілген әк өндірістік мақсатта, нақтырақ айтқанда, тал егуге дайындық жұмыстары аясында пайдаланылғанын мәлімдеген.

Алайда Абиров нұсқаманың толық орындалмағанын айтып, 7 мамыр күні табиғат қорғау прокуратурасына қайтадан арыз жолдағанын хабарлады.

Айнұр САПАРОВА

Бүгін, 12:11