Атырауда 6 мыңнан астам ірі қара вирустық инфекцияларға шалдықты, шығын бар

Атырауда былтыр желтоқсаннан бері 6 мыңнан астам ірі қара малдан ауру шығып,  алтауы шығын болған. 

Былтыр 22 желтоқсанда Құрманғазы ауданының төрт ауылында сиырлардың арасында сілекейі ағып, ауыз қуысы қабынып, дене қызуы көтерілгені туралы хабарлама тіркелген. Келесі күні ауру белгілері байқалған малдардан сынама алынып, тексеруге жіберілген. Олардан вирустық және инфекциялық аурулар табылған. Ресми ақпарат бойынша, қазір ауру шыққан ауылдарда жағдай тұрақты.

Ауыл шаруашылығы және жер қатынастары басқармасының баспасөз хатшысы Ақтілек Нұроллаеваның сөзінше, былтыр желтоқсанда ауданның Бөкейхан, Дыңғызыл, Еңбекші, Құрманғазы төрт ауылдық округінде ауру белгілері бар малдардан алынған сынамаларға жүргізілген зертханалық тексерулер нәтижесінде вирустық диарея және инфекциялық ринотрахеит ауруларының қоздырғыштары анықталған. 

Оның сөзінше, үш айдың ішінде алты мыңнан астам сиыр ауырып, 87 пайызы емделіп шыққан. Қазір Атырау облысындағы эпизоотиялық ахуал бақылауда. 

- Қазіргі таңда ауданда 663 қора-жайда (оның ішінде 609 жеке үй және 55 шаруа қожалығы) 6316 бас мал ауруға шалдыққан. Оның 5484 басы емделіп шықса, 826 бас мал ем қабылдауда. Өкінішке қарай, 6 бас мал шығын болған. «Ұлттық референттік ветеринариялык орталық» зертханасында вирустық диарея, инфекциялык ринотрахейт, пастереллез жене аусыл ауруыларына зерттеу жұмыстары жүргізіліп, 2025 жылдың 30 желтоқсанында вирустык диарея жене инфекциялык ринотрахейт ауруларының қоздырғыштары анықталды, - дейді Нұроллаева.

Одан бөлек, Исатай ауданының төрт ауылдық округінде де дәл осы ауру түрлері анықталған. 

- Исатай ауданында күні бүгінге инфекциялық ринотрахеит және вирустық диарея аурымен барлығы 889 бас ірі қара малы тіркелген. Оның 728-і емделіп, 161 басы емделуде. Шығын жоқ. Эпизоотиялық ахуал тұрақты, - деді Нұроллаева

“Қалған аудандар әзірге тыныш. Ветеринариялық-санитариялық шаралар кешені уақтылы жүргізіліп келеді” дейді баспасөз хатшысы.

Малдан малға жұғатын бұл ауруды мал қайдан жұқтыруы мүмкін деген сұраққа ал  “ауадан, ластанған су, жем-шөп, тасымалдау кезінде болуы мүмкін. Нақты себебі анықталмады” деп жауап берді. Аурудың таралуы әлі тоқтаған жоқ. Ресми ақпаратқа сүйенсек,  эпизоотиялық ахуал бақылауда. 

Айнұр САПАРОВА

27 наурыз, 18:05