Атырауда электроника дүкенінің сатушысы тоғыз iPhone телефонын ұрлаған

Дүкен басшылығы сатушы-кеңесшінің әрекетін, ол ұрланған телефондардың ақшасын толық қайтарғаннан кейін, кешірген.

Іс материалдарына сәйкес, дүкен қызметкері ірі электроника дүкенінен iPhone смартфондарын біртіндеп алып кетіп отырған. Кейін оларды адамдарға нарықтағы бағадан арзанға сатып жіберген.

Жалпы алғанда дүкеннен тоғыз телефон жоғалған. Олардың ішінде: iPhone 15, iPhone 16, екі iPhone 16 Pro, төрт iPhone 16 Pro Max (ең қымбатының бағасы 999 990 теңге болған), iPhone 13 бар.

Телефондардың жоғалғаны түгендеу жүргізу кезінде анықталған. Бейнебақылау камераларының жазбаларын тексергеннен кейін күдікті қызметкер тез анықталған.

Компанияға келген жалпы шығын 6 миллион теңгеден асады.
Сотта ер адам кінәсін толық мойындаған. Ол бұл әрекетке ақша қажет болғандықтан барғанын айтқан. Сот қаралғанға дейін ол компанияға келтірілген барлық шығынды толық өтеген. Сондықтан дүкен өкілі оған қатысты шағымы жоқ екенін мәлімдеген.
Соған қарамастан, сот оны сеніп тапсырылған мүлікті ірі көлемде иемденіп алғаны үшін кінәлі деп таныды.
Сот үкімі бойынша 3 жылға бас бостандығын шектеу жазасы берілді; 3 жыл бойы материалдық жауапкершілігі бар қызметте жұмыс істеуге тыйым салынды; 100 сағат қоғамдық (мәжбүрлі) жұмыс істеу міндеттелді.

Анастасия ШЕРСТЯНКИНА

Бүгін, 11:52